Ayera riba dia di San Valentin diferente scol, negoshi y organisacionnan a celebra e dia aki den diferente forma. Riba e dia aki Kids & Youth in Action Foundation a invita tur su miembronan pa un actividad na lama na unda nan a haci wega, a baila y a disfruta di nan dia.
Kids & Youth in Action Foundation ta un fundacion cu ta enfoca ariba actividad sano pa muchanan despues di scol. E fundacion ta consisti primordialmente di mucha muhe di 4 aña pa ariba cu ta baila diferente estilo di baile y ta presenta na varios caminda rond di Aruba.
Kids & Youth in Action tin mas di 30 aña di existencia bao direccion di juffrouw Debra Boekhoudt. Durante henter aña e fundacion ta activo cu diferente presentacion, actividad y lesnan pa e muchanan. Ariana Lake, miembro di Kids & Youth in Action y un di e organisadornan si e actividad a conta Bon Dia Aruba cu e actividad a bay hopi bon y tur mucha a disfruta. “Nos juffrouw a duna nos e tarea pa organisa e actividad aki pa yuda nos cu nos habilidadnan organisativo. Nos a haci diferente wega manera wega di awa, wega di bala, wega cu tubo. Nos a haci wega pa e muchanan chikito y pa e muchanan mas grandi, separa. Tur cos a bay hopi bon y mi ta contento cu nos a haya e oportunidad pa organisa e actividad. Mi a siña cosnan nobo door di esey,” Lake a bisa.
Ayera pa celebra dia di San Valentin e miembronan di Kids & Youth in Action a disfruta di un bunita actividad organisa pa e miembronan mes na unda nan a hunga diferente wega di lama, nan a baila y a gosa di principio te fin.
