Mamanan di Kids & Youth in Action Foundation a celebra dia di mama cu un anochi di Karaoke yen di ambiente, baile y cantamento.
Celebracion di dia di mama ta mañan y ya caba diferente organisacion y institucion ta organisando diferente evento y actividad pa asina celebra e mamanan y laga nan sinti special.
Kids & Youth in Action Foundation ta un organisacion cu tin mas di 30 aña di existencia y tin un grupo di baile pa mucha y hoben. Pa celebra dia di mama e fundacion a invita e mamanan di e grupo pa un anochi di karaoke.
Juf. Debra Boekhoudt, directora di e grupo, a conta Bon Dia Aruba un poco di e meta tras di e actividad y e importancia di demostra aprecio pa e mamanan, specialmente pa celebra nan dia. “E ta hopi importante pa ora cu bo tin un organisacion tin un harmonia y bon colaboracion den e organisacion y e mayornan ta forma un parti hopi importante di esaki,” Boekhoudt a splica. Pa e directora ta importante pa e mayornan sinti aprecia y cu nan tambe ta parti di e grupo. Tin biaha, e ta remarca, e rol di e mayornan ta hasta mas importante cu esun di e muchanan mes cu ta baila. “Sin nan e organisacion no ta draai,” el a agrega.
E ta enfatisa cu riba dianan special, celebracionnan special manera dia di mama e gusta celebra e mamanan y demostra e aprecio pa tur loke nan ta haci pa e organisacion y mas importante pa nan yiu. “E ta bunita pa laga nan sinti aprecia y cu nos ta tene cuenta cu tur e trabou importante cu nan ta haci como miembro di e organisacion y mas importante como mama,” el a finalisa.
