Mama mia, Mama mia, Mama mia! Pa ora e edicion aki wordo publica mi lo ta na Italia purbando di haya mi futuro casa y comiendo pasta. No worry, mi ta bin bek un djis ki, of miho na Italiano, “tornare”. Ban papia paso redo tin!
Pa esunnan cu ta biba bou piedra, min sa si boso a tuma nota cu recientemente algo basta grave a pasa cu un revista na Aruba. Nos no ta bay menciona nomber, pero e revista aki a tuma e creme de la creme di hende color scur riba e isla y hinca nan den un edicion cu nan a yama ‘the black issue’. Tur e hendenan di color cu den un manera ta resalta riba e isla a wordo entrevista y duna espacio den e revista. Esaki riba su mes ta algo bunita. Tanto ‘black beauty’ mester wordo celebra, den e mesun manera cu ‘black struggle’ mester wordo reconoci, pasobra tur dos ta presente den nos sociedad.
E problema ta cu den e revista nan a hinca un editorial cu tabata explora e mito y realidad di un hende color scur. Akinan ta caminda cos a bay robes. Nan a tira tur hende color scur bou di stereotiponan cu pa hopi tempo nan ta lucha pa destrui. Desde referencianan na nan holo corporal te na e size di e genitalnan di homber color scur, tur cos a wordo discuti manera cu e no ta algo problematico of leu di ta e realidad. Nan a pone un contraste cla entre hende blanco y hende di color, sin tene en cuenta con esaki por a pone hende sinti. Algo cu a cuminsa manera un soño pa hopi di esunnan cu a tuma parti den e edicion a caba como un pesadilla cu a laga atras un mal memoria. Y si e editorial tabata problematico, mas problematico ainda tabata con e revista a reacciona na e slander cu nan a haya. Pasobra kico hende ta kere cu nos ta den den aña 1800? Cu bo por haci y deshaci sin wordo lastra? Cu bo ta untouchable? Cu nos ta kens y no por wak racismo ora e wordo poni nos dilanti? Nan a pidi disculpa den e manera mas baho posibel. E tipico ‘nos no ta racista, sorry si nos a ofende bo e no tabata nos intencion’ yada, yada, yada.
Un disculpa cu tabata mustra leu di ta sincero, nan a delete e comentarionan di tur hende cu tabata purbando di educa nan riba con nan ta fout. Pues nan no a mustra di ta interesa den dialogo, di purba di comprende, di mustra un poco integridad. Atrobe, mescos cu tur otro caminda nan a explota no solamente e dolor, pero tambe e imagen y e creatividad di hende di color pa nan gana. Specialmente awo cu Merca tin e Black Lives Matters Movement y e ta mustra ‘hip and cool’ pa explora e topico. Mi hendenan, si bo no ta un hende color scur, bo no tin niun business skirbiendo tocante kico ta nan realidad. Bo no ta biba esaki, e no ta bo luga. Tin un diferencia entre un entrevista y un testimonio, un diferencia entre investigacion y un opinion. Ami mes den e comunidad di color tin poco privilegio, pasobra aunke cu mi ta un muhe di color, aunke mi cabey ta un afro y mi nanishi ta bon rondo mi color di cuero ta cla. Esaki ta haci cu mi no por identifica cu e realidad cu mi muhenan color scur ta biba.
Esaki kiermen cu ora e ta yega na papia di colorismo, ami tin cu pasa e mic pa un otro persona pasobra e no ta mi experiencia. Riba Facebook hende ta tag mi pa loco, wardando pa mi bisa algo ‘sabi’, mi ta contento cu hende ta asocia mi cu discusionnan tocante rasa. Contento cu hende por wak inhusticia y pensa ‘Yakari please say something’ pero kico mi por bisa cu mi no a yega di bisa prome? Como junior journalist mi a entrevista varios hende color scur den e transcurso di mi trabou cu Bon Dia Aruba y tin hopi prueba di nan experiencianan negativo pa motibo di nan color di cuero na Aruba.
Desde stereotiponan cu nan ta wordo hinca aden, desde discriminacion, termento, wordo yama ‘zwarte piet’ na scol. Tur testimonionan valido cu mester wordo tuma na cuenta si nos kier progresa como sociedad. Racismo den Caribe no ta solamente bibo, e ta den bon estado di salud, e ta fuerte, e ta cana riba nos cayanan y e ta haci nos hendenan dolor. Nos no ta husga e revista pa a comete un eror. Tin ora nos no ta wak un poco mas leu cu nos propio experiencianan.
Nos tur ta ignorante riba cierto topiconan, nos tur tin cosnan cu nos no sa, pero mi hendenan nos mester keda habri pa siña. Bo no por ofende un hende cu bo ignorancia y djis bisa sorry sin comprende pakico bo ta fout. Cada eror ta un oportunidad pa siña y e ta ora pa nos wak e asina ki.
No tene berguensa di ta fout, tene berguensa di no kier siña, pasobra ta e ora ey bo ta ignorante di berdad berdad
