Den su relato anual di 2015 Conseho Consultivo (Raad van Advies, RvA) ta trece dilanti e idea di crea un corte constitucional como extra garantia riba calidad di legislacion y gobernacion. Ta referi na e corte constitucional cu St. Maarten tin desde 10 di october 2010. Kico un corte constitucional ta haci? En general, e corte ta evalua si ley of otro areglo legal ta cuadra cu loke Constitucion ta prescribi. Den caso cu e corte ta haya cu e ley of otro areglo legal no ta cumpli cu loke Constitucion ta prescribi, e por pasa na dicta eliminacion di e areglo legal specifico ey. Tin hopi mas detaye envolvi den esaki pero esey no ta e enfoke mayor di e articulo aki. Importante ta pakico nos Conseho Consultivo ta di opinion cu nos mester considera introduci un corte di e caracter aki.
Den su relato anual 2015 RvA ta constata cu cierto frustracion cu na dos ocasion den e aña referi a pasa ley den Parlamento cu bien tabata merece cu Gobernador lo a keda sin firmanan, pa seguidamente e leynan aki bay pa Raad van State duna su opinion riba nan. Esey no a sucede y ambos ley a bay na vigor. Un di nan ta e ley pa institui e Colegio di Supervision Financiero (CAFT) y e otro ta e ley pa coregi asuntonan financiero de presupuesto 2013, cu no a sucede dentro di e aña ey mes, por medio di e presupuesto complementario. RvA ta haya cu unabes e aña en cuestion a cera, no ta posibel mas pa bin cu un ley pa hustifica y legalisa e placa ey cu a gasta sin un base legal. RvA ta di opinion cu loke a sucede no ta toca solamente e aspecto di responsabilidad civil di e ministro en cuestion, sino tambe aspectonan di indole penal. Den ambos caso RvA a mustra gobierno di antemano riba e fayonan den e proyectonan di ley aki, pero no a haci caso. Ta sucede regularmente cu gobierno ta trata conseho di RvA como ‘djis un conseho’.
Y como organismo di conseho so, RvA ta consciente di e hecho cu nan mes no tin papel di hunga como extra garantia pa evita cu ta crea mal legislacion loke por tin repercusion pa hopi aña despues. RvA ta referi tambe na e structura cu nos parlamento tin unda no tin un camara superior cu ta haya tur ley cu a pasa den e prome proceso di aprobacion, pa nan repasa henter e proceso y mira si tin motibo pa aproba o rechasa. Esey ta e caso den parlamento di mayoria di pais grandi, manera Hulanda tambe conoce un Eerste y un Tweede Kamer. Pa un pais chikito tabatin su logica pa no introduci un sistema asina caro. Pero awor nos ta sinta cu e problema, cu si un ley cu fayo aden logra pasa parlamento, practicamente no tin manera mas pa para e trein. Dos aña pasa e papel cu Gobernador por hunga den desaprobacion a keda ampliamente discuti y comenta. Te awor ainda tin hopi hende cu ta kere propaganda politico cu Gobernador mester firma ‘bij het kruisje’ y cla ta. Esey no ta asina y no ta conoci pakico, sigur den e caso di e ley di reparacion di presupuesto di DOW pa 2013, Gobernador a opta pa firma e ley aki. RvA por tin rason cu tabatin base pa no aproba e ley aki.
Pio ta cu e tipo di practica aki ta sigui su curso normal. Nos ta keda confronta cu e fenomeno di un gobierno cu ta laga parlamento aproba su presupuesto, ta bolbe bin Parlamento cu un presupuesto complementario asina laat den aña cu e placa extra ta gasta caba, y despues ta bira gasta mas placa pafo di ambos presupuesto. Y esaki cu un impunidad cu casi a bira algo natural caba cu mayoria di nos no ta ni mira como algo contra ley, cu ta prescribi cu mester autorisacion di antemano di Parlamento pa uza fondo publico. No ta bay solamente pa e aspecto di actua contra ley, ta trata tambe di e problema di maneho financiero di un pais cu por bira incontrolabel, na momento cu por gasta cuanto placa cu ta haya ta bon, pasobra semper tin un mayoria den parlamento pa tapa delaster un violacion di ley di banda di e mandatarionan.
Awor, un corte constitucional por yuda remedia esaki? Parcialmente si, den e sentido cu por elimina reglanan legal cu no ta bon y no ta cuadra cu Constitucion. Ademas esey ta cera porta pa trece e mesun areglo legal aki atrobe, pasobra e lo haya e mesun trato. Sigur esaki por yuda pa limita e espacio liber cu e mandatarionan tin actualmente pa maniobra. Cu esey ainda e mentalidad no a cambia y esey ta otro parti di e asunto. No tur cos por resolve trahando un cantidad di ley pa bay vigila. Parti mester bin di mandatarionan responsabel cu ta actua na un manera corecto. Y esey nos no ta mira ainda.
