Gobierno actual tambe ta laga nos den incertidumbre?
De bes en cuando e consulta bi-anual di e paisnan den Reino ta resulta util pa pone algun cos skerpi, pa nos y pa otronan. Aparentemente, y nos no sa ken ta e responsabelnan, a papia cu e parlamentario Hulandes Ronald van Raak (Socialistische Partij) unda a dun’e e siguransa cu e proyecto ta andando y ta bay sigui. Riba su peticion pa wak e refineria e contesta tabata negativo, en todo caso di banda di Citgo. Sr. Van Raak y su colega Andre Bosman (VVD) a dicidi pa bay tira un bista nan mes na San Nicolas. Y segun nan, en todo caso loke nan a mira, no ta indica cu tin algo ta move eyden. Mester bisa si, cu e material fotografico cu nan a produci, tur ta saca di pafo. Pero cu no tin ningun chimenea ta saca huma, esey nos tur na Aruba sa. Supuestamente e trabao ta keto bay den un fase di preparacion di e plannan concreto cu mester ehecuta pa yega na e fase cu por cuminsa opera. Esey no ta e punto mas importante.
E punto clave ta cu no tin financiamento pasobra Pdvsa y Citgo no tin ni pa nan mes, y e tremendo idea pa laga e contratistanan mayor busca financiamento no a resulta. Pa colmo e situacion di e empresa madre, cu mester provee e crudo cu mester bay upgrade na Aruba, ta den un caos di produccion di cual nan no lo sali den e proximo añanan. Al contrario, e situacion ta empeorando rapidamente y no mester keda straña si e aña aki e produccion sigui cay, di actualmente 1,7 miyon bari pa dia, pa alrededor di 1 miyon bari limpi. Esaki lo ta catastrofal pa e pais, cu pa tur cos ta depende di e empresa aki. Produccion interno a cay asina leu cu un gran parti di e necesidad di cuminda, remedi, pero tambe tur otro cos, mester bin di exterior y mester paga cu divisa. No tin placa ni pa drecha infrastructura basico di Pdvsa na Venezuela mes, te pa nan haci algo na Aruba.
Anto den e situacion aki, ainda tin hende cu tin stoma pa conta e Hulandesnan cu e refineria ta canando su curso y lo bay habri? Acaso ta un set di inepto nan ta kere e Hulandesnan aki ta, y cu na Aruba nos tampoco sa lesa ni scucha? Laga nos duna un ehemplo bon cla di con cierto informacion ta confirma loke nos tin mas di un aña ta trece dilanti tocante e refineria, basa entre observacion aki na Aruba, y den exterior. Siman pasa, den e plannan di WEB Aruba NV a aparece diripiente cu WEB ta bay caba cu su consumo di fuel oil y ta bay cambia pa gas natural. E gas natural ey ta bin cu barco directamente na unda e planta ta. Pregunta: ah, ok, con a para anto cu e famoso plannan di haya gas via un pipeline di Venezuela pa e refineria? Esey no ta sigui mas…? Naturalmente nos sa e contesta caba; no ta di awor e medio di comunicacion aki ta registra tur e señalnan cu ta positivo o negativo pa cu e refineria y tur cos rond di esey.
Pero, pa keda na e gas na WEB; esaki ta un posibilidad cu tabata existi trinta aña pasa tambe. Loke a pasa semper ta cu tabatin un contracto cu e refineria cu tabata percura pa fuel oil, hasta si nan mes no ta produci esaki, mescos ta haci desde inicio di añanan 80 caba cu gasolin. Laga nos pensa: si WEB ta bay uza gas, anto FMSA (di nos e ta…) no ta importa fuel oil mas y e refineria no ta bay percura p’esey tampoco, pasobra ta crudo mehora nan ta produci. Nos no a core puntra con e cos aki ta hinca den otro, pasobra nos tabata warda si ta bin mas informacion al caso, o si tin otronan cu tambe ta observa e asunto aki. Nada. Anto bon, nos mester tuma esaki como señal cu tin un situacion na e refineria cu ta indica cu no lo tin huma ta sali di ningun chimenea? Y kico tur e consecuencianan lo ta di un incumplimento di e Venezolanonan pa cu e proyecto? Manera e dicho netamente Arubano ta bisa: Bo no por pluma un dori… Djis mira e caso den aviacion unda Venezuela debe miyones na companianan local. Lo a papia esey tambe cu e delegacion Chavista?
Nos ta bolbe ripiti loke nos a trece dilanti recientemente caba, pero awor cu mas enfasis: nos ta kere cu Aruba merece claridad encuanto e refineria. Tambe pasobra esaki ta yuda clarifica e postura cu nos mester tuma contra Venezuela pa loke ta e otro asuntonan cu ta pendiente. Nos mester mehora nos vigilancia, pero nos no mester hacie pa cumpli cu nan, no na prome luga. Nos mester cumpli cu nos mes, pasobra entre otro e caos na Barcadera no ta cos di awor so, e tin algun aña ta stoba caba. Pero no tin motibo pa no para firme contra Venezuela; nos no ta depende di nan.
