Despues di varios yamada sin exito pa haci un formacion, e sargento cu ta comanda e grupo a rabia. “Nos ta parce un desastre. P’esey hende ta papia malo di e grupo di milicia,” el a grita. Edith, un muhe flaco di 56 aña, a lanta pura, a laga e sombra bao di e palo y a core pa drenta den formacion hunto cu su compañeronan bao di e solo hopi fuerte.
Ta dificil pa logra cu e grupo di homber y muhe di diferente edad y cu un uniforme color beige, por keda ordena den formacion militar. Nan ta e grupo di milicia, e cuerpo di hende civil cu ta voluntario y cu ta complementa e forsa arma di Venezuela, segun ley desde aña 2008.
Nan a participa desde siman cu a pasa, den varios ehercicio di defensa integral, cu presidente Nicolas Maduro a ordena despues cu presidente di Merca, Donald Trump a bisa cu e no ta descarta un “opcion militar” contra dictadura na Venezuela.
E anti-imperialismo contra Merca ta un seña grandi cu ta marca e identidad di e revolucion Bolivariano, cu Hugo Chavez a cuminsa y cu awor Maduro ta continua. Gobierno socialista ta bisa cu Venezuela ta un lugar unda hopi hende ta desea di biba pasobra tin reserva di petroleo grandi, rikesa mineral y un posicion strategico.
Venezuela ta culpa Merca di duna apoyo na grupo di oposicion y asina busca un cambio di gobierno, manera a tuma lugar na aña 2002, tempo cu oposicion a purba di organisa un golpi di estado contra Chavez. Chavismo ta acusa oposicion di dirigi un guera economico tambe.
Awor e declaracion di Trump y tur sancion di Washington ta reforsa e idea di un supuesto menasa contra Venezuela, cu ta bin for di un enemigo exterior, y cu mester protege pueblo Venezolano. Den e mision patriotico e forsa arma Venezolano ta integra pa ehercito, armada (marina), aviacion y guardia nacional. Civil, hunto participando como voluntario organisa den milicia tambe ta forma parti. E totalidad aki ta conoci cerca gobierno di Venezuela como e union civico – militar cu ta defende patria y e movimento di socialismo Bolivariano.
Gruponan di oposicion ta critica gobierno pasobra nan ta siña hende civil pa tira cu arma di candela, na un pais cu tin hopi arma y ta den e grupo di pais mas violento di henter mundo. Oposicion ta critica tambe cu gobierno ta profundisa den militarisacion di sociedad y ta duna recursonan pa prepara e poblacion pa un “guera imaginario”.
Origen
Milicia tin su origen den un mito. Algun hende ta bisa cu e ta origina den tempo di e guera di independencia (1810-1823). Otro di nan ta keda ams cerca y ta menciona e origen di milicia desde e golpi contra Chavez na 2002, tempo cu nan simpatisantenan a sali riba caya pa exigi cu Chavez ta bolbe. Finalmente presidente Chavez a bolbe na palacio Miraflores.
E origen legal ta mas cerca. Na luna di augustus di 2008 a ser aproba e ley organico di e forsa arma nacional Bolivariano, caminda ta crea e milicia como un “cuerpo special” cu ta depende di presidencia y cu a ser crea pa “complementa forsa arma cu ta defende Venezuela”. Ex-presidente Chavez, tabata purba di pone den ley y via di un ley organico, e proyectonan cu e no a logra introduci den constitucion.
E reforma di e constitucion na aña 2007 tabatin como plan di introduci e grupo di milicia como un di cinco componente di forsa arma na Venezuela. Pero e Chavistanan a perde e referendo, y no a logra nan deseo. Nan mester duna validez na e texto aki via referendo. E consulta di referendo ta un di e poco procesonan cu Chavismo a perde den 18 aña.
“Ta e pueblo arma, e guera di henter pueblo,” Chavez tabata bisa y awor
Maduro ta ripiti mesun cos. Ta normal cu e constitucion nobo, cu a wordo crea pa Asamblea constituyente ta busca di introduci e grupo di milicia, como e di cinco componente di forsa arma.
Vietnam
Oficialismo ta kere cu Merca ta menasa Maduro y e pueblo directamente. Contra e menasa aki e gobierno a bisa cu su ehercito hopi chikito por derota Merca, manera a tuma lugar na Vietnam. “Pueblo mester siña, manera pueblo di Vietnam a siña, pa asina defende nan tera cu un cuchiu, un piedra, un palo, cu su mesun curpa, cu cualkier cos,” presidente Maduro a bisa.
Fin di siman cu a pasa, varios video a keda publica riba rednan social, caminda ta mustra varios entrenamento di hende civil sin uniforme y di algun miembro di milicia. Nan ta haci hopi ehercicio fisico y di tiro. Den e practica varios hende grandi a participa tambe.
Riba rednan social algun hende ta hari y a compara e suceso aki cu e grupo di soldad hopi prepara y ekipa di Merca. Merca tin e forsa militar mas poderoso di mundo. Sin embargo e grupo di milicia no ta preocupa cu algun declaracion cu henter mundo por lansa riba rednan social.
“Ami a laga mi miedo mi tras. Den poligono di tiro ami ta soda, yora y hari,” Edith a declara. E tabata bisti un uniform color di tera cu pechi, sapato preto y un gilet berde.
E paña ta e unico cos cu e miliciano ta haya. Algun di nan tin un funcion mas permanente, ora cu milicia ta brinda seguridad na lugar manera hospital, y pa esaki nan ta haya un salario minimo. Tur diasabra nan ta haya instruccion militar, practica y teoria, durante cinco o seis ora. Cada batayon por ta integra pa 300 voluntario.
Na luna di april presidente Maduro a priminti cu pa aña 2017 e lo haya 500.000 miliciano. Maduro a priminti tambe pa duna un arma di candela na cada un. Te awor e promesa no a ser cumpli ainda, aunke den caso di conflicto nan lo tin acceso na un arma di candela pa cada un.
“Nos lo duna nos bida”
No ta parce cu e motivacion di miliciano ta haya placa of un arma di candela pa participa henter fin di siman na plasa Venezuela di Caracas. Nan a bay cerca di Fuerte Tiuna, cu ta un compleho militar na Caracas. Ta parce cu nan ta convenci di sigui e revolucion.
“Nos ta cla pa defende tur logro di e revolucion den 18 aña,” Julio Pérez, reservista di 52 aña y cu hopi experiencia militar a splica.
E dia tabata hopi cayente y tur di nan tabata purba di haya sombra bao di un palo. Algun di nan tabata bisti uniform cu un sweater oranje. Come algun fruta tabata e unico forma pa refresca.
“Nos ta lanta den arma, na lucha. Nos ta un pueblo dispuesto pa defende patria y asina lo continua den lucha. Nos lo duna nos bida si mester defende Venezuela,” Perez a bisa. E ta un tecnico kimico superior di profesion. Johnny Cárdenas, di 36 aña a bisa mesun cos cu Perez. “Esun cu no ta un miliciano, no ta stima su pais.” E ta bende caramel pa 100 bolivar pa un.
Ningun hende ta kere den un conflicto arma cu Merca. Pero si algun dia ta sucede, milicia ta cla pa duna nan cara.
“Si nan ta bin cu mal intencion, mester responde cu mal intencion tambe. Nos ta pueblo y nos ta defende nos mes di cualkier manera, inclusive si nos mester muri,” Cardenas a splica. El ta un trahado independiente cu ta participa na tur practica. “Mi ta prepara pa sali riba caya arma pa defende mi pais,” Patricia Villareal a splica. E tin 27 aña y ta reparti su tempo entre seguridad di un hospital, entrenamento di milicia y su tres yiu.
“Ami a nace soldad”
E grupo di muhe cu ta participa den milicia ta pensa cu desde hoben nan tabata sinti interes pa bida militar. Milicia a logra cumpli nan meta pa un grupo di persona humilde di Caracas, cu ta bibando den bario manera Catia y El Valle.
“Chavez a duna mi e oportunidad di drenta. Mi a nace soldad,” Mirelis di 55 aña a splica. Edith y Mervis, dos miliciano mas a bisa cu “den e grupo di milicia no tin ningun problema cu edad, ni rasa.” E ta un muhe grandi di apariencia fragil. Nan a para pa un potret. “Asina nos ta pose pa e cobarde di Trump,”un di nan a bisa. De repente e sargento a yega y ta grita. Nan, hopi obediente, a lanta pa bay den formacion cu disciplina y poco orden.
