E gobierno demisionario di Hulanda a cuminsa mustra diente na un manera nunca visto. Asina ta parce en todo caso: medida di Reino contra gobierno di Curaçao, medida na caminda contra gobierno di St. Maarten den e caso di integriteitskamer, invasion den cas y oficina di un ministro na Aruba. Tur esaki ta casualidad? O ta forma parti di un maneho no nobo, pero si reforsa, pa duna mas contenido na rechtshandhaving na e islanan? Sigur ta cu cada caso tin su similaridad, pero tambe su diferencianan. Ban tira un bista.
Na Curaçao ta trata di un problema cu basicamente ta e caso di un politico, ya condena den corte di prome instancia pa corupcion y labamento di placa, y cu segun e leynan vigente por funciona ainda como parlamentario. E persona astuto aki a logra haci uzo di e posibilidadnan crea den añanan reciente pa su adversarionan, cu por substitui un gobierno demisionario, cu ya a yama eleccion, cu un gobierno ‘interino’ cu tin como unico tarea percura pa eleccion tuma lugar ordenadamente, y atende solamente asunto coriente. Tabata di anticipa cu esey no lo a stroba e coalicion nobo pa purba posterga y/o para eleccion y keda sinta como gobierno.
A bin un intervencion di banda di gobierno di Reino den forma di un decreto real (Koninklijk Besluit/KB) cu a pone henter e proceso electoral den man di Gobernador. Y e siman aki a tuma luga otro accion contra e homber fuerte di e coalicion, a base di sospecho di soborno di otro politico, esaki pa e join e filanan di e coalicion. Posiblemente esaki ta bay desemboca den otro caso penal contra e persona fuerte aki, cu manera sa bisa na Hulandes:”het jongetje wil gewoon niet deugen.”
Na St. Maarten tin otro caso. Na e isla aki, cu tin un track record admirable di corupcion, den añanan 90 caba tabatin un maatregel van rijksbestuur pa pone un fin na e reinado di corupcion y teror di Claude Wathey. Cos nunca a drecha di e tanto ey y recientemente (2015) a yega na un acuerdo entre gobierno di St. Maarten y di Hulanda (Reino), pa crea un integriteitskamer pa purba combati corupcion den gobernacion y criminalidad cu ta relaciona cu esaki. E camara ta consisti di tres miembro, un nombra pa gobierno di Reino, un pa gobierno di e isla, y un tercer persona apunta como presidente pa e dos miembronan. E camara tin autoridad pa haci investigacion den aparato gubernamental den cuadro di integridad, o e falta di esaki, y por haci denuncia na Ministerio Publico autonomamente.
Actualmente e isla ta al borde di un medida di gobierno di Reino, ya cu St. Maarten no tin ningun pura pa cumpli cu loke a palabra. Corte Constitucional di e isla a haya cu mester cambia e set up riba algun punto, loke a tarda e proceso, pero desde e sentencia ey no a sucede nada. Por ta cu gobierno di Reino no ta pasa pa un KB, pero esey ta depende di e actual gobierno pa colabora pa yega na e instrumento di control aki.
Na nos mes Aruba no tabatin ni menasa di un medida di Reino, pero nos a haya un masha practico mes. Un invasion spectacular na un gran cantidad di vivienda y oficina, cu e seyo indiscutible di gobierno Hulandes. No ta parce cu tabata un accion inicia na Aruba mes, den cual a haya apoyo di Hulanda. Ta parce mas bien cu a interveni na cada isla, pa dos motibo. Uno ta cu e situacion na cada isla tabata rekeri esey. Na Curaçao esey tabata e set up di un gobierno posiblemente ‘cumpra’, bao di liderazgo di un persona condena caba pa corupcion. Na St. Maarten tabatin varios situacion no solamente di corupcion, sino tambe di colaboracion cu crimen organisa.
Cerca nos e punto di salida tabata un caso di corupcion posiblemente organisa for di despacho di un ministro, pero cu tin su ramanan ta bay den diferente direccion. ‘Time will tell’ te unda e investigacion lo yega, pero sin duda algun, enbes di grita cu e ta inocente, ta bira tempo pa na nos isla nos cuminsa pensa riba kico mester sucede pa stop e practicanan aki, di cual nos tur sa cu nan ta existi, y nos tur a siña, sigur den e ultimo 30 añanan, cu cana e caminda corecto como ciudadano no ta yuda pa bo haya loke bo a pidi. Si ta trata di tereno, o permiso pa un persona di exterior como empleado, tur cos ta mustra manera un odisea interminable, a menos cu bo bay cerca un ‘profesional’ den e materia, cu ta ‘connect the dots’ pa bo.
Pero, ‘no hay mal que por bien no venga’, nos por cuminsa haci nos politiconan e preguntanan al caso, ora ta debati riba cierto cartera, unda ta conoci cu tin problema. Tal vez un integriteitskamer ta algo cu por considera, pero tur esey no ta necesario si nos no tin politico cu ta bay den gobernacion pa sali cu mas placa cu ora nan a drenta. Ban cuminsa eynan.
