(AP) – E termino ‘metaverse’ ta e palabra mas recien pa captura imagen di industria tecnologico – asina hopi cu un di e plataformanan mas conoci riba internet ta cambiando su nomber pa señala su adopcion di e idea futuristico.
Anuncio di CEO di Facebook, Mark Zuckerberg diahuens cu e ta cambiando e nomber di su compania na Meta Platforms Inc., of Meta en corto, por ta e cos mas grandi cu ta pasa cu e metaverse desde cu escritor di ciencia ficcion, Neal Stephenson a bin cu e termino pa su novela di 1992, ‘Snow Crash’.
Pero Zuckerberg y su team ta leu di ta e unico visionarionan di tecnologia cu ideanan riba con e metaverse, cu lo conta cu un mescla di realidad virtual y otro tecnologia, mester tuma lugar. Y algun cu ta pensando riba esaki pa algun tempo caba tin preocupacion riba un mundo nobo mara na un gigante di rednan social cu por haya acceso na mas datonan personal ainda, y ta acusa di faya di stop e proliferacion di desinformacion peligroso y otro dañonan online cu ta agrava problemanan di mundo real.
Kico ta e Metaverse?
Pensa di dje como internet treci na bida, of al menos, den 3D. Zuckerberg a describi esaki como un ‘ambiente virtual’ den cual bo por drenta – na luga di djis mira riba un pantaya. Esencialmente, e ta mundo di comunidadnan virtual interconecta sin fin, unda hende por topa cu otro, traha y hunga, usando headset di realidad virtual (VR), bril di realidad aumenta (AR), app di smartphone of otro aparato.
Tambe e ta bay incorpora otro aspecto di bida online, manera compras y rednan social, segun Victoria Petrock, un analista cu ta al tanto di tecnologianan emergente. “E ta e siguiente evolucion di conectividad unda tur e cosnan ey ta cuminsa bin den otro den un universo doppelganger sin frontera, pues bo ta biba bo bida virtual di mesun forma cu bo ta biba bo bida fisico”, el a bisa.
Kico por haci den e Metaverse?
Cosnan manera bay un concierto virtual, biaha online, mira of crea arte y pas of cumpra paña digital.
E metaverse tambe por ta vanguardista den e cambio pa traha for di cas memey di pandemia di coronavirus. Na luga di mira coleganan den un grid di video yamada, empleadonan por join otro den un oficina virtual.
Companianan tecnologico ainda mester haya un manera pa conecta nan plataformanan online cu otro. Pon’e traha ta bay rekeri plataformanan tecnologico den competencia pa bay di acuerdo cu un set di standard, pa asina no tin ‘hende riba metaverse di Facebook y hende den metaverse di Microsoft’, Petrock a bisa.
Facebook ta bay completo den metaverse?
Zuckerberg ta poniendo hopi riba loke e ta mira como e proximo generacion di internet pasobra e ta kere cu ta bay ta un parti grandi di e economia digital.
Criticonan ta puntra nan mes si e potencial cambio lo por ta un esfuerso pa distrae di e varios crisis di e compania, incluyendo accionnan anti-competencia, testimonio di ex-empleadonan whistleblower, y preocupacion tocante su maneho di desinformacion.
E metaverse ta djis un proyecto di Facebook?
No. Otro companianan cu ta promocionando e metaverse ta inclui Microsoft y e fabricante di chip, Nvidia. “Nos ta kere ta bay tin cantidad di compania ta construi mundo y ambientenan virtual den e metaverse, den e mesun manera cu tin cantidad di compania ta haci cos riba e World Wide Web”, segun Richard Kerris, vicepresidente di plataforma Omniverse di Nvidia. “Ta importante pa ta habri y extensible, pa asina bo por teleporta na mundonan diferente sea di un compania of otro, di e mesun manera cu mi ta bay di un website na otro website.”
Companianan di video game tambe ta tumando un rol lider. Epic Games, e compania tras di e wega popular Fortnite, a recauda $1 biyon for di inversionistanan pa yuda cu su plannan a largo plaso pa construi e metaverse. Plataforma di wega Roblox ta otro participante grandi, delineando su vision di metaverse como un luga unda ‘hende por bin hunto dentro di miyones di experiencia 3D pa siña, traha, hunga, crea y socialisa’.
Esaki lo ta un manera mas pa haya mas di mi data?
Zuckerberg su adopcion di e metaverse den algun forma ta contradeci un mandamento central di su mayor entusiastanan. Nan ta imagina e metaverse como e liberacion di cultura online for di plataformanan tecnologico manera Facebook, cu a asumi propiedad di cuenta, potret, post y playlist di hende y a comercialisa loke nan a saca di e data aki.
“Nos kier por move rond internet cu facilidad, pero tambe nos kier por move rond internet di un forma cu no ta track y monitor nos”, segun venture capitalist Steve Jang, un managing partner na Kindred Ventures enfoca riba tecnologia di criptomoneda.
Petrock a bisa cu e ta preocupa riba e hecho cu Facebook ta purbando di lidera e traspaso na un mundo virtual cu lo por rekeri mas datonan personal ainda, y ofrece un mayor potencial pa abuso y desinformacion, mientras cu no a drecha e problemanan aki riba su plataformanan actual.
