Kico sorpresa electoral… Por trece pa nos…?

Eleccion na Hulanda a atrae bastante interes, hasta na nivel internacional. Medionan Mericano manera Associated Press a dedica amplio atencion na e resultado sorprendente, principalmente e victoria remarcable di e partido di ultra-derecha PVV, cu nan lider controversial Geert Wilders. A conecta esaki cu e desaroyonan politico na Europa, unda na varios pais a surgi exito electoral di partidonan populista conservador, manera na Hungria y recientemente Italia. Tambe ta indica e motibonan tras di e cambionan aki, unda na promer lugar ta aparece e problema di inmigracion, di refugiado y otronan cu ta mas bien hende cu ta busca un mihor porvenir na Europa.

Ya ta birando mas y mas dificil pa yega na acuerdo na nivel Europeo pa e problema di refugiado, despues di e ola di migrante di Siria y recientemente e guera na Ucrania, cu a causa un fluho di miyones den henter Europa. Fuera di eesey tin e migrantenan di otro paisnan cu no ta den guera, cu tambe ta busca otro bida na Europa. Gobierno Hulandes a mantene pa hopi tempo nan maneho humanitario pero a cuminza sinti un cierto cansancio den poblacion Hulandes, pasobra entre otro escasez di vivienda ya tabata un problema, cu entrada di varios grupo grandi hopi antes cu e guera na Ucrania a surgi. Esaki a conduci na problema den gabinete Hulandes, di tal forma cu no por a yega mas na un acuerdo hustamente riba e asina yama ‘asielbeleid’ cu a desemboca den caida di gobierno. E mesun tema aki lo ta riba mesa den cualkier intento di forma gobierno den e proximo dia y simannan. Hopi lo depende si tin partido, cu den pasado no tabata kier a goberna cu PVV pa nan ideanan extremista, cu awor si lo ta dispuesto pa en todo caso scucha loke Wilders tin di ofrece. En principio por tin un coalicion di partido di derecha y centro, cu un mayoria den parlamento (PVV, VVD, NSC), suficiente pa un base di 81 asiento den Tweede Kamer. Otro opcion, pero cu menos probabilidad, ta un coalicion entre VVD, GL/PVDA, NSC y D’66. Esaki anto lo trece back na mesa e mero motibo di e caida di e actual gobierno demisionario, mientras cu GL/PvdA ta debe su aumento den voto na un campaña progresista, entre otro cu un enfasis fuerte riba mantene e maneho humanitario pa cu refugiado. E señal politico cu e partidonan a haya ta hustamente cu e ciudadano den gran mayoria kier un cambio di e maneho di duna acceso na grupo grandi di migrante.

Pa e islanan Hulandes, incluyendo Aruba, lo mester warda pa mira ki tipo di coalicion lo keda instala. Den caso di un gobierno mayoritariamente derechista, manera describi anteriormente, por anticipa un actitud mas fuerte den direccion di exigi un ley di Reino di supervision, cu ta abarca e parti clave di e supervision, sin tanto consideracion di e propuesta haci pa gobierno di Aruba, di un modelo ‘hibrido’ unda ta propone un reparticion di tarea entre un ley di Aruba y un ley di Reino. Loke en todo caso ta parce urgente ta e finalizacion di e acuerdonan entre nos Promer Ministro y e Secretario di Estado, pa loke mester ta e cambionan pa haci den e ley di supervision financiero di Aruba (LAft), pa entrante 1 di januari 2024 tin un supervision financiero vigente. Esaki no tin mester di warda riba e gabinete nobo, ya cu e secretario di Estado tin mandato pa yega na tal acuerdo sin mester bolbe cerca Conseho di Ministro di Reino. Di otro banda, nos ta yegando na fin di november y ainda no a anuncia cu e dos mandatarionan a yega na un acuerdo final. Por anticipa cu lo tin un reaccion fuerte di gobierno (demisionario) Hulandes, si no tin un ley di supervision di Aruba aproba pa 1 di januari 2024, cu por actua y como cu probablemente nan no ta bolbe, nan no lo tin problema cu garantiza cu tin supervision financiero, si mester usando otro instrumento legal di Reino.

Naturalmente por scucha comentario caba di un actitud fuerte contra e islanan autonomo, specificamente Aruba y Corsou, pero mester tuma esakinan cu cierto realismo. Gritonan di banda Hulandes pa obliga e islanan di somete nan mes na loke Hulanda ta desea o bira independiente, ta expresion di hende, sea ignorante o cu conscientemente ta usa menaza como arma politico, sin cu tin un posibilidad realistico pa haci esaki for di Den Haag. Cu un figura manera Wilders bira premier na Hulanda no ta cambia nada na e realidad cu e derecho di autodeterminacion di e islanan ta algo cu ningun gobierno Hulandes ta bay mishi cune. E unico manera pa sali di Reino ta si mayoria di poblacion di un isla opta pa esaki y nos no ta mira esey como un opcion realistico. No mester lubida cu e motibo pakico Aruba no a bira independiente na 1996, no tabata solamente pasobra no tabatin un apoyo popular pa esaki, sino cu presion Mericano, cu tabata teme pa e situacion cu lo a surgi na un Aruba independiente, den porta di Colombia como e tempo ey e peligro mayor di e region pa loke ta narcotrafico. Un eventual presion di Den Haag den e direccion ey lo resulta atrobe den bishita di embahador Mericano na Den Haag…

Esaki ta significa anto cu un gobierno di cualkier indole na Den Haag mester deal cu e islanan, pero nos tambe no tin opcion, cu cualkier gobierno na mando, pa colabora dentro di Reino, pa nos mes bon. Nos no ta bay niun caminda, nan tampoco…