Kico sindicato y gobierno… No ta comprende atrobe…?

Nos a bolbe yega na un punto unda nos tabata algun tempo pasa. E punto cu mester puntra algun sindicato, no tur, ta kico nan no ta comprende di e actual situacion den cual nos pais ta. Den e actual crisis en berdad a pidi un gesto di e empleado publico y di esnan cu ta ricibi salario paga pa gobierno, pa entrega parti di nan salario. Esey a tuma lugar y a traves entre otro di e reduccion di gasto di payroll di gobierno a yega na un reduccion general tambe di gasto di presupuesto.

Asina mes, loke nos ta mira ta un aña di fia hopi mas placa, pa paga entre otro e salarionan actual, mientras nos tabata caba na un debe publico astronomico. Gobierno no a presenta un presupuesto pa 2021 ainda, loke mester a sucede basta dia caba, y di nan banda nan ta comete e eror di no duna claridad unda nos ta para pa otro aña. Esey ta duna oportunidad na e tipo di iniciativa sindical aki, cu ta pidi pa un respuesta bon cla, pero no ta hay’e. E carta di nos Promer Ministro di siman pasa na e sindicatonan ta pusha henter e asunto di presupuesto pa promer trimester di 2021, pasobra mester negocia cu Hulanda ainda. Esey por ta berdad, pero por a negocia hopi promer caba cu Hulanda, si no a tarda tanto pa yega na un acuerdo, di manera cu por a traha mas tempran caba riba presupuesto 2021. Asina aki henter e situacion incierto ta keda move bay den futuro, sin cu ta bin un claridad kico ta bay sucede e aña entrante.

Esaki no ta conta solamente pa e empleado publico y otronan dependiente di gobierno, sino tambe pa sector priva, tanto pa empresario como empleado den e sector aki. Si nos ta comprende e carta bon, ya caba ta tuma como un hecho cu pa e aña aki no ta bay tin claridad unda nos ta bay y esaki ta inaceptable. Si e sindicatonan ta exigi claridad mescos cu otro partinan di sociedad tambe kier esey, nos por ta di acuerdo; nos tambe ta exigiendo esaki pa basta tempo caba, mientras nos ta mira tempo costoso bay benta afor, pasobra gobierno aparentemente ta secuestra pa e partinan mas conservador di e partido grandi den coalicion, cu aparentemente ta pone nan interes promer cu interes di Aruba.

Sin embargo, ta keda e punto di bin cu exigencia sindical na un momento cu nan sa masha bon cu no tin placa pa paga salario y cu ta fia ta fia pa paga e salarionan reduci. Placa cu den futuro nos mester bay paga back. Y cu ‘nos’ nos kiermen nos como comunidad… E situacion aki ta birando mas critico ainda na 2021, manera nos a splica ampliamente den diferente Editorial anterior. Ta p’esey ta asina importante unda nos ta bay na 2021. Na lugar di esey nos ta haya cada vez un pida informacion, pa nos bay ‘figure out’ kico esaki tin como consecuencia, manera por ehemplo awor cu a bin claridad cu e aña aki no lo tin turismo crucero mas. Esaki riba e incertidumbre cu tabatin caba pa loke ta turismo ‘stayover’ cu lo haya golpi severo di e situacion na Merca, unda e pandemia ta drentando un fase mas grave cu nunca. Den e dianan aki cu tur atencion na Merca tabata bay na eleccion, e pais a yega na e nivel di mas di 100.000 caso nobo pa dia. Como agravante, e periodo di invierno ta apenas cuminzando… Esaki por pospone nos recuperacion economico pa un periodo desconoci na 2021. Naturalmente esey no ta culpa di ningun hende aki, pero si nos tur ta mira e panorama cu ta desaroya nos dilanti, lo ta bon pa nos por mira e contesta oficial kico nos ta bay haci.

Pa bolbe na e tema central pa e sindicatonan, envez di aumento di salario ta net lo contrario nan por spera. Y aki nos ta ripiti loke nos a trece dilanti na otro ocasion: cu loke nos ta mira pasando caba cerca e companianan estatal, cu nan sobrevivencia dependiendo di reduccion serio di salario y/o reduccion di personal, ta algo cu lo mester bay tuma lugar dentro di henter e aparato publico tambe. Si den tempo di bonanza ya caba mantene mas di 8.000 hende riba payroll tabata un locura, awor cu nos ta den crisis esey solamente a bira mas grave ainda. E dilema cu t’ey grandemente ta con pa ataca e problema. Tradicionalmente nos politiconan a core pa e problema, tratando di acomoda exigencia di sindicato di un banda, mientras no tin medida pa limita cupo di trabao. Y pakico no? Pasobra semper eleccion ta e consideracion cu t’ey den background. Ta p’esey cu den tempo bon no a limita e aparato, y awor den tempo malo ta bin e argumento acerca cu ta duro pa pone hende riba caya sin un futuro. For di punto di vista humano nos por comprende esey, pero no ta exactamente esey ta hiba nos na e medida pa reduci salario ‘across the board’ mas ainda, pa despues cuminza cu restructuracion y un salida gradual di e exceso di empleado? Ta kico tin ey cu sindicato ni gobierno no kier comprende/reconoce?