Faltando su clausura awe nochi, Carnaval 2016 ta tras di lomba atrobe. Despues di topa cu varios contratiempo, por bisa cu e parti mas importante en todo caso no tabata falta y esey ta e ambiente (carnavalesco). Manera den tur cos cu ta celebra anualmente, inmediatamente preparacion pa Carnaval 2017 ta cuminsa… awor! Y semper e etapa nobo mester cuminsa cu un evaluacion di kico a bay bon, y kico a bay menos bon, pa por drecha esey den e proximo evento. Kico a bay bon? Aki semper nos ta core e riesgo di no menciona algo, fomentando reaccion di hende cu ta desea completa e lista. Pero, nos no ta traha lista, mas bien ta señala e aspectonan cu pa nos a resalta mas tanto.
A pesar di un tempo di preparacion masha cortico, e eventonan preparatorio manera eleccion di diferente reina y prins a bay bon, den sentido di trabao organisatorio. Di mes, cada tanto aña carnaval ta cay tempran den aña y ta algo cu mester por anticipa. E tono negativo grandi tabata e contest di caiso & soca monarch cu no a tuma luga. Sin bay den e diferente opinionnan cu nos a scucha di tur banda, mester constata cu si e actornan mayor tabata di acuerdo cu e contest ta parti vital di carnaval, anto nan mester a pone orguyo personal un banda y laga interes general prevalece. Suficiente pa constata cu esey no a sucede, punto. Ta di spera cu pa otro aña e asunto aki keda regla na tempo y di bon manera; nan ta condena na traha cu otro con cu bay bin.
Mester bisa si cu e falta di e contest no a influencia e musica, cu e aña aki tabata di bon nivel y cu esey tabata un ‘highlight’ di e carnaval, manera mester ta pasobra carnaval sin musica no ta carnaval. Loke no mester perde di bista ta cu competencia entre musico cu e contest ta representa, ta importante pa stimula e musiconan pa saca tur loke tin di nan talentonan. Den e sentido ey e mester ta presente como un di e aspectonan renoba den carnaval, pasobra ta esey ta haci e carnaval di e aña particular ey resalta riba esunnan di pasado.
Otro aspecto indispensabel ta e abundancia di color y trahe bunita cu sigur tabata presente atrobe. Aña tras aña nos por mira grupo cu un exceso di color bunita cu ta duna e carnaval di Aruba su atraccion. Loke si ta haci falta ta e carosanan luhoso cu naturalmente ta obra di hopi energia y inversion pa realisa. Lo ta un lastima si e aspecto aki bira cada bes menos, ya cu tin caba un abundancia di trailer y truck (di bebida y cuminda) den e parada, sin adorno significante, cu ta domina henter e escenario demasiado y no ta añadi na e beyesa di e gruponan bailando, cu ta keda e parti fuerte di e parada.
E organisacion di e paradanan grandi na San Nicolas y Playa a conoce algun problema, cu sigur tin solucion. Realmente por bisa cu ta problema cu no tabata t’ey den pasado y no tin pakico di t’ey awor. E orario di salida por ehemplo. Manera ta bisa na Ingles:” If it ain’t broke, don’t fix it.” E decision pa laga e paradanan cuminsa te 1’or di merdia a ocasiona cu e final di ambos parada a drenta te den scuridad. Esaki ta haci’e menos atractivo pa e participantenan, pa e publico cu no por gosa completamente di e colorido di e gruponan y a rek tambe e tempo di warda prome cu e parada yega. Ademas nos iluminacion di caya no ta nada di gaba, asina cu di e banda ey nos no por spera ayudo tampoco. Simplemente den scuridad henter e ambiente ta cambia. E no ta bira un sorto di parada di luz di un momento pa otro y ta mas bien mata e parada prome cu yega final.
Di parti di autoridadnan policial por comprende nan preocupacion, ya cu den scuridad tur tipo di problema ta mas probabel pa sucede. Sigur ora tuma na cuenta cu no ta e participantenan so ta consumi alcohol, sino e publico na banda tambe. Naturalmente esey no ta conta pa tur hende, pero despues di un dia largo riba caya den solo, e mechanan ta bira bastante cortico.
E idea pa e parada cuminsa na unda e tabata caba anteriormente, tin su bentahanan. Bailando contra biento ta mas fresco pa e participantenan, aunke biento duro contra ta un desafio pa esnan cu roadpiece grandi. E consideracion cu e salida pabao ta miho pa e turistanan banda di waf nos ta haya un argumento no valido. Nos no mester ‘haci cos pa turista’, pero haci loke nos ta haci y nan ta bin pa aprecia loke nos ta haci “as is”. Turismo rond mundo ta bayendo den e direccion di atrae turista cu e cultura y tradicion manera e ta, y no un version special pa turista. Manera den tur cos cu nos ta haci, ta importante mantene un balansa entre innovacion y conserva loke ta bon.
