E debate continuo na Colegio Arubano tabata trata tambe e asunto di salario di e ‘bombero’ Hulandes cu mester a bin paga candela. Un di e Arubianonan envolvi den dirigencia di Colegio pa hopi aña a manda un carta habri pa ministro encarga cu Enseñansa cu a sali publica den diferente medio, tambe den esun aki. Un di e temanan trata tabata e hecho cu e personanan treci di Hulanda tabata haya hopi mas paga cu loke tin poni oficialmente pa e puesto di rector na Colegio. Entre otro ta surgi e pregunta di unda a sali extra placa pa paga e ‘mercenarionan’ aki cu supuestamente a bin pa ‘pone orden’. Pa legitimo cu e pregunta aki ta parce, nos mester reconoce cu gobierno(nan) tin mil aña ta paga e tipo di experto aki salarionan masha halto mes, den cierto caso hopi mas cu loke e ministronan ta gana.
Tin un caso conoci di un director interino cu a bin pa reorganisa un departamento, cu tabata haya casi 21 mil florin pa luna. Despues di dos aña y sin ningun resultado a termina e contract. Cu su MAVO e tabata dirigi un departamento cu varios academico, cu experiencia y cu no a haya e beneficio di duda, mientras cu nan si tabata conoce e departamento y su tareanan di cerca. E argumento tabata, y nos ta sinti cu den e caso di Colegio atrobe esey ta hunga un papel, cu nan ta trece un experticio necesario cual ta imposibel pa haya na Aruba na e momento ey. Esey por ta e caso, pero no ta bisa ainda cu e persona en cuestion ta capaz pa duna exactamente esey. No mester lubida cu hopi biaha, ora por haya persona den exterior cu tin gana di bin Aruba pa un tempo limita, nan ta haci esey pasobra nan mes mester di un ‘break’ of nan ta net na un momento morto den nan carera den nan pais. Con tal cu Aruba ta un bon excuus pa sali for di nan ambiente pa haya poco aire fresco. E pregunta sin embargo ta si e motivacion pa realmente traha duro y enfrenta critica aki na Aruba ta di e grandi ey. Cu dos fracaso tras di otro ta di spera cu e afan pa trece mas ‘bombero’ di Hulanda of otro pais lo a bira menos y ta busca un solucion mas cerca di cas.
Tur esaki ta trece nos na e pregunta crucial: tin limite pa pago di e tipo di job aki? Ta hustifica pa paga un experto, proba o no, mas y hasta dobel di loke un ministro ta haya como salario? Poniendo un banda eventual observacion sarcastico cu no ta asina dificil pa haci un miho trabao cu un di nos ministronan y por lo tanto merece mas cu nan, nos ta kere cu e casonan ey mester keda masha limita. Pero esey ta asina? Por lo menos nos sa cu e empleado publico ta mara na e categorianan di salario cu gobierno conoce, pero esunnan cu ta traha a base di un contract no ta mara na esey. Hasta ta asina cu hopi di nan ni sikiera ta aparece riba payroll di gobierno, pasobra nan tin un contract di un compania priva cu gobierno, y nan como persona ta haci e trabao aki na nomber di nan mes compania.
Otro punto debil den henter e asunto aki ta e evaluacion di e persona cu a trece aden cu tanto expectativa. Con por spera di e mesun personanan cu a trece aden, pa defende o reforsa nan posicion, cu nan ta bay admiti cu e resultadonan di e persona experto aki no ta loke a spera na inicio. Y na ken e decision ta pertenece pa bisa cu e formula no a traha y cu por lo tanto mester termina e contract? Aki tambe nos ta topa cu un caso unda ‘e carnicero mes ta keur su carni’. Mas transparencia por yuda den e caso aki. Pero no transparencia den e sentido cu despues di hopi presion publico, e entidad en cuestion ta duna un minimo di informacion, lagando mas pregunta cu esunnan cu a contesta. Nos ta referi na transparencia di tal forma, cu ora ta formula un proyecto di mehoracion cu ta exigi e presencia di un experto externo, ta formula tambe e mecanismo y proceso pa control y evaluacion obhetivo, cu no ta encera solamente participacion di esunnan cu por describi como ‘carnicero’. Si den e caso concreto aki di Colegio Arubano nos ta papiando di placa di Pais Aruba cu ta destina pa paga un tal experto, anto mester percura pa nos tin e trayecto di control pa evita loke a pasa awor dos biaha caba. Mester contrata un persona pa un cierto suma, cu di algun manera mester ta limita tambe segun cierto norma. Talbes tempo pa introduci un tipo di ‘Balkenendenorm’ manera na Hulanda, unda ta limita tur salario, relaciona na salario di prome ministro di e pais? Cu nos medionan gubernamental financiero limita, sigur algo pa considera.
