Kico por haci cu cas y edificio bandona?

Nos tur conoce nan. E ruinanan den cualkier bario di nos isla, sea ta cas o edificio comercial. Tin cu tin cuarenta aña bashi y laga pa nan cuenta, otronan ta di fecha mas reciente. Tin di nan cu ta consecuencia di un conflicto matrimonial, den cual ningun di e dos partidonan ta permiti e otro regla un posible benta di e propiedad y yega na un areglo pa comparti e beneficionan cu ta resta. Finalmente, no tin nada pa ningun hende, y ademas comunidad ta hinca cu un bista mahos, un peligro pa salubridad publico, y ta parce cu nada ta sucede pa cuminsa atende e problemanan aki. E pregunta ta: kico por haci pa soluciona, talvez no tur, pero sikiera un gran parti di e casonan aki?

E problema aki tin varios aspecto cu merece nos atencion. Un prome asunto ta encera e papel cu gobierno tin pa yega na solucion di e casonan aki. Ta existi varios instrumento legal y un di nan den e Ordenanza di Construccion y Vivienda (Bouw- en Woningverordening; AB 1999 no. GT 9) cu ta describi e posibilidadnan pa declara un cas o edificio den asina mal estado, cu no ta keda otro opcion cu mester tumba e construccion. Naturalmente cu prome cu esey por tin e posibilidad di haci reparacion na e propiedad, si acaso for di e inspeccion tecnico resulta cu esey ta un posibilidad pa salba e construccion. Anto e ora ta na e propietario pa haci esaki segun e indicacionnan di e informe, traha pa e tecniconan corespondiente di Dienst Openbare Werken.

Laga nos tira un vista riba e detayenan di e ley aki. Un prome asunto ta pa ki tipo di construccion esaki ta valido. No ta trata solamente di edificio, sino tambe di muraya o separacion di tereno di cualkier tipo, cu posiblemente pa nan mal estado por representa un peligro pa comunidad. Den caso cu e departamento concerni (DOW) constata tal situacion, ministro encarga cu obra publico, den un decreto ministerial cu ta contene e motibonan pa cual a yega na tal decreto, por obliga e propietario(nan) pa dentro di e periodo indica den e decreto, haci e reparacion indica di tal forma, cu ta cumpli cu loke e decreto ta stipula. Ta keda escogencia di e propietario pa kita e construccion completamente tambe y di e forma aki cumpli cu e meta di e decreto, esta pa elimina un peligro  publico.

Ademas tin e posibilidad cu e ministro encarga ta yega na conclusion cu desocupacion y ciere di e edificio den mal estado ta necesario, pasobra na su parecer e mal estado di e edificio ta representa un peligro directo. Den caso cu e propietario no a actua riba loke e decreto ministerial ta rekeri pa haci, segun articulo 44, inciso 1 di e ley menciona, anto e ministro ta autorisa, en vista di peligro inminente, pa laga haci e reparacionnan, o caso dado, tumba e construccion parcial o totalmente,  y cobra e propietario(nan) e costonan di e trabao aki. Den caso cu e propietario a apela contra decision di e ministro, durante proceso e ministro ta haci solamente uso di su facultad pa actua, si esaki pa motibo di peligro inminente ta inevitable.

E ley ta trata tambe e situacion cu ta surgi ora desocupacion (ontruiming) ta bira necesario.  Articulo 47 ta trata e situacion aki, mas specificamente e situacion ora ta evalua cu un vivienda ta den asina mal estado, causa pa humedad o otro situacion no higienico, y a notifica e propietario por escrito di e orden pa dentro di un cierto termino, cumpli cu e mehoracionnan indica. E notificacion ta bay como copia tambe pa e tenedor di hipoteca y pa e persona cu ta biba den e vivienda, si esaki mes no ta e propietario di e vivienda.

Articul 48 ta trata e situacion cu ta surgi, ora no a haci caso di e orden pa haci e mehoracionnan considera necesario, y ta sigui usa e lugar como vivienda. Den e caso aki e ministro encarga por declara e vivienda no habitable (onbewoonbaar) y ta ordena tambe e desocupacion dentro di e termino cu el a stipula pa esaki, incluyendo e ciere di e vivienda, pa tanten esaki ta necesario.

Articulo 49 ta stipula ken autoridadnan lo mester notifica di e decision pa desocupa e lugar. Esey ta e tenedor di hipoteca, na e adres cu el a registra tempo di inscripcion di e hipoteca, e propietario y si e mes no ta biba den e edificio, e persona cu ta biba aden o ta haci uso di esaki.  Articulo 50 ta indica cu mester pega un anuncio riba e edificio, riba cual por lesa den letter bon cla: “onbewoonbaar verklaarde woning” o, caso dado, “wegens gevaar ontruimd”.

Articulo 51 ta regla e desocupacion mes, di parti di cuerpo policial, despues cu e termino cu a duna pa realisa e desocupacion riba propio iniciativa, sin cu e habitante a haci caso, cu muestra di e orden pa desocupacion y den presencia di, sea e funcionario envolvi di ministerio publico, o di un fiscal auxiliar di husticia (hulpofficier).

For di loke nos a describi aki di e partinan mas esencial di e cuadro legal cu ta existi, nos por conclui cu a primera vista no falta nada esencial pa e autoridadnan gubernamental haci nan trabao. Sin embargo nos por constata cu ta masha poco nos ta mira cu ta tuma accion berdaderamente pa evita peligro pa comunidad, tanto pa loke ta peligro di derumbe completo, como tambe di punto di vista di higiena.

Pero tin otro aspecto importante cu nos no mester perde  di vista: cuanto tereno ta keda ocupa pa edificio o vivienda cu no por usa, mientras e demanda pa tereno pa construi ta birando dia pa dia mas grandi? Como agravante, nos tin e situacion di escasez di tereno cu ta haci cu di mes ningun gobierno no lo por bay cumpli cu e demanda grandi aki. For di publicacionnan oficial nos por destila cu nos tin mas di 11.000 peticion pa tereno erfpacht, pa construccion di vivienda. Di otro banda, expresion publico haci pa e mandatario actual (demisionario) ta duna cuenta di un disponibilidad ainda di talvez 1000 tereno erfpacht. E conclusion anto ta cu e mayor parti di e peticionnan nunca por haya un contesta positivo. Independiente di con mester maneha e mal noticia aki politicamente, ta keda e pregunta kico por haci pa mas tanto tereno cu ya caba tabata den uso, pero pa mal mantenimento o otro motibo no ta disponible, por ser usa atrobe. Asina sikiera un parti di e demanda grandi di tereno pa vivienda y otro uso por haya solucion.

Den esaki naturalmente mester haci un distincion entre loke ta tereno priva y tereno di propiedad publico. Den caso di tereno priva, autoridadnan gubernamental por pasa pa demolicion di un construccion si peligro inminente ta rekeri esey. Pero ta keda na e propietario di e tereno si e ta desea di construi algo nobo, o laga e tereno manera cu e ta, esey ta su libertad.

Otro cos ta e casonan di construccion den deterioro riba tereno erfpacht, unda autoridadnan tin no solamente facultad pa actua pa tumba e construccion, pero tambe pa redestina e tereno. E ley concerni den e caso aki, ta e ordenanza encuanto emision di propiedad (publico) (Landsverordening Uitgifte Eigendommen; AB 1989 no. GT 21) cu ta contene e reglanan corespondiente den caso cu esun cu a haya e erfpacht, no ta cumpliendo cabalmente cu e rekisitonan di e ley. Por ehemplo, no finalisa un construccion y laga e parcela bandona cu un edificio mita traha ariba, o laga un vivienda completa bay perdi, sin cu tin hende ta biba aden, ta casonan cu por conduci na intervencion di autoridadnan pa revoca e permiso.

Articulo 9 di e ley ta stipula cu e tenedor di e permiso di erfpacht ta obliga pa mantene tur loke ta construi riba e tereno emiti den bon condicion. Esaki no ta conta solamente pa un vivienda, pero tambe pa e cura di e cas.

Segun articulo 13 di e ley, ministro encarga cu Obra Publico por declara e derecho riba erfpacht caduca, si e propietario no ta cumpli cu rekisito di e ley, cu ta entre otro pago na tempo di e erfpacht, o si a duna e tereno un otro destino cu esun pa cual a emiti e erfpacht. Tambe ora e tenedor di e derecho di erfpacht ta haci cos cu ta prohibi segun e ley, o ta keda sin cumpli cu cierto obligacionnan cu e tin segun e ley, esaki ta base pa pa pa declara e derecho riba erfpacht caduca. E condicionnan describi den articulo 9 ta entre e condicionnan cu cual mester cumpli.

Logicamente e ley ta contene tambe stipulacion con autoridadnan mester actua den caso di kita e tereno di e tenedor di erfpacht. Por ehemplo, den caso cu ta trata di un vivienda cu cierto valor, mester percura pa benta publico di e construccion riba e tereno, despues di cual e propietario anterior tin derecho riba e beneficionan di e benta, despues di kita e gastonan cu gobierno a incuri den  e proceso.

Conclusion

Mirando e totalidad di instrumento legal cu tin pa actua, ta dificil pa mantene e tesis cu un gobernante no tin e instrumentonan legal pa actua, pa percura cu comunidad no ta core riesgo den caso di propiedad bandona o den mal estado. Hasta por mira cu den e caso di construccion riba tereno di propiedad publico, emiti pa gobierno den forma di erfpacht, tin mas instrumento disponible pa kita tereno for di un cierto usuario cu no ta cumpli cu su obligacionnan, y eventualmente redestina e tereno.

Manera nos a conclui anteriormente, esaki por bira den futuro inmediato, no solamente un posibilidad, sino mas bien un necesidad, mirando e escasez di tereno disponible pa vivienda y uso comercial/industrial. E experiencia ta cu den gobierno nunca tin tanto voluntad pa haci algo den e casonan aki. Contrario na ora ta emiti tereno, cual por considera haci hende fabor, ora di dicidi y ehecuta e casonan di demolicion y redestinacion ta toca tereno politico sensitivo. Cu tur comprension, esey no ta kita cu por actua, y dado momento, lo mester actua.