Desde algun tempo por a tuma nota di e guera entre e taxistanan y e ministro encarga cu Transporte Publico. E ministro ta bisa cu su recien publica decreto ministerial ta pa drecha cierto asunto encuanto transporte di taxi. Specificamente e ta referi na abuso di permiso di taxi. Esaki den sentido di permiso cu ta pasa pa otro persona cu no ta famia directo, unda hasta lo tin caso di haci negoshi cu permiso. Si tin caso di e tipo di abuso aki ta tumando luga, e ministro ta den su derecho, y hasta obligacion, pa actua contra esaki. Pero, den e caso ey lo mester mira prome kico ta e instrumentonan cu e ley y e decreto existente ta brinda caba.
Den e ley mes (Landsverordening Personenvervoer AB 1995 no. GT 23) ta regla caba cu, den caso di incapacidad di e persona individual cu tin un permiso pa taxi pa haci e trabao e mes, e ministro encarga por nombra un otro persona como reemplasante di e tenedo di e permiso. Pa por haci esaki, e ministro mester scucha opinion di e Comision di Conseho, menciona den articulo 4, consistiendo di 7 miembro nombra pa e ministro encarga. Tres miembro mester ta representa e tenedonan di permiso of organisacionnan cu ta representa e gruponan aki. Pregunta: unda e Comision ta?
Esaki ta mas importante ainda pasobra e Comision tin como tarea di duna conseho den tur caso di peticion, cambio, traspaso, renobacion of revocacion di permiso. Tambe e Comision por duna conseho na ministro den otro asunto cu ta relaciona cu transporte di persona, riba nan mes iniciativa. Tarea y forma di traha por keda stipula via un ‘landsbesluit houdende algemene maatregelen’ (LB HAM), algo cu nunca a sucede.
Seguidamente e asunto di con regla substitucion di e tenedo di permiso den caso di incapacidad pa opera e vehiculo. E ley ta duna suficiente regla pa esaki: por pidi permiso pa un otro persona actua como reemplasante di e tenedo di permiso. E peticion aki tambe mester bay via e Comision pa duna su conseho. Tambe den caso di enfermedad serio y hasta fayecimento esaki ta regla caba con ministro, despues di conseho di e Comision, por dicidi di duna un familiar di e tenedo di e permiso e oportunidad pa tuma su luga.
Conclusion: no ta mira pakico e ministro mester bin awor cu regla pa cos cu ta regla caba. Si e ministro ta bisa cu tin abuso den esaki ta pasobra e no ta respeta e caminda legal di investigacion cu e ley ta pone den man di e Comision. Aparentemente, na luga di aplica ley ta den despacho di e ministro mes ta haci investigacion y ta conseha ministro pa si of no otorga permiso y cambio den esaki. Anto bo ta haya ‘accidente’ pa via di ‘bad judgment’ di e ‘dream team’ di e ministro mes… Ademas, e ley ningun caminda ta duna e ministro e potestad pa impone un registro di chauffeur auxilia, for di cual un taxista mester scoge den caso di cu e no por maneha su mes vehiculo.
Di otro banda, e ministro concerni ta keda sin drecha cos cu tin añanan ta pidi pa esaki. Kico pensa por ehemplo di cu e ley (articulo 7) ta bisa cu un NV of otro persona huridico mester tin un directiva (director of directornan) cu ta consisti den su totalidad di persona di nacionalidad Hulandes, naci na Aruba, cu tin nan residencia na Aruba. E regla aki por tabatin sentido den pasado, pero despues di e ola migratorio di añanan nobenta y despues, cu dies miles di persona residencia aki cu derecho adkiri, ta imposibel pa mantene e regla aki. Banda di esey articulo 9 ta bisa cu tur permiso mester ta riba nomber di un persona natural cu ta responsabel pa e permiso.
Imagina un NV cu tin un compania di huur auto cu centenares di auto, cu ta cambia di director. Diripiente mester bay cambia tur permiso, un pa un, pone nan riba nomber di otro persona. Esta un eficiencia y molester innecesario pa e empresa. E departamento no ta keha pasobra nan ta mira solamente e placa cu ta drenta pa cada permiso cu mester cambia. Anto esaki nos kier yama atende y boga pa interesnan di un economia sano? No ta esaki ta e cosnan cu tantisimo biaha Camara di Comercio y otro gremio empresarial ta trece dilanti, pa por fabor cuminsa kita obstaculo pa haci negoshi for di caminda? Y pakico e peticionnan hustifica aki ta ocasiona asina hopi rabia cerca nos mandatarionan, na luga di tuma nan na serio? Ta ki otro interes nan por ta sirbiendo cu e caminda cu nan ta scoge awor, den e caso specifico aki sigur?
Nos tin e impresion cu atrobe e ministro ta haya conseho di hende, talbes den su mes despacho, cu ta comprende menos di e materia cu e mes. Anto ta logico cu bo ta haya e sorto di regla pseudo legal aki cu ta troce ley na luga di aplica regla existente.
