Kico Himno y Bandera ta significa?

E prueba ta den practica diario

Ta casi 18 di maart atrobe. Aruba ta preparando pa un otro fin di siman yen di tur sorto di celebracion, cultural of deportivo, y mas. Esey pa nos como Arubiano no ta ningun problema, nos ta bon den fiesta. Y mester bisa tambe cu un pais cu no ta educa su yiunan kico ta aprecia bo patria, no mester keda straña cu e resultadonan despues ta segun bo mes a actua. Loke bo sembra, bo ta cosecha, esey ta conta pa esaki tambe.

Sin embargo, nos ta sinti cu algo falta den tur esaki. Despues di evalua e fin di siman festivo aki, lo no ta bon pa nos para keto un rato, con nos ta practica, den e resto di aña, e amor pa patria ora no tin celebracion? Si nos ta stima e isla aki asina hopi, y nos no ta duda di esey, y nos ta comprende y comparti esaki, con bon nos ta comporta nos mes den nos relacion cu e luga di nacemento di un gran parti di nos? Y pa e otronan cu no a nace aki, pero a bira ciudadano di e luga aki y ta mes orguyoso cu esun cu tin su lombrishi dera na algun parti di e baranca aki? Laga nos purba analisa anto kico talbes nos por mehora den nos manera di comporta cu nos pais.

Un di e prome cosnan na cual nos mester presta atencion, ta nos mucha y hobennan. Ta bunita pa yama nan futuro di nos pais y comunidad, pero cu esey nos no a cumpli ainda cu e deber di siña nan, y duna nan e ehemplo necesario. Ta facil pa para banda di e yiu na un of otro celebracion, pa enfatisa e importancia di bandera y himno, pero kico nos ta haci cu e yiu e resto di aña? Pasobra amor pa patria mester t’ey tambe riba e dianan cu no tin nada di celebra, pero si di cumpli. Ora nos caba di siña e yiu tur cos di bandera y himno, nos lo mester cuminsa cu e tarea grandi ainda pa siña nan cumpli, cu cos grandi y cos chikito. Y no ta bay solamente pa siña nan disciplina, pero prome cu tur cos pa percura pa nan haya e atencion y cariño cu nan mester.

Esey por zona masha facil y nos tur por core bisa cu nos si ta cumpli, pero nos tur sa cu den e sociedad y economia den cual nos ta biba, hopi di e cosnan aki no ta simpel y logico. Hopi di nos muchanan no ta haya e atencion y guia cu nan mester. Mama y tata ta traha y ta haci milagro chikito tur dia pa cumpli cu trabao y otro tareanan di cas. Nos no por keda bisa cu nan mester duna nan yiu atencion si e cos aki a bira un problema structural caba, cu pa añanan ta exigi nos atencion, y no ta hay’e, en todo caso no na un nivel cu ta haci un diferencia. Nos no por biba cu e nostalgia di antaño tempo cu e mamanan pa gran mayoria tabata na cas y e mucha cu yega di scol tabatin un hende pa ricibie. Si nos no ta atende e problema aki debidamente, nos por keda bay celebracion di bandera cu e yiu, pero e atencion di e mama o tata, of otro persona, den resto di aña lo keda falta.

Otro ehemplo unda nos ta fayando, ta por ehemplo den percura pa nan ta lanta den un comunidad limpi y ordena. Awor, hopi di nos ta tene nan cas y cura bastante bon, pero con nos ta haci cu esunnan cu no ta cumpli, y pio ainda, esunnan cu ta kere cu sushi ta algo cu bo por benta unda cu ta, den mondi, canto di caminda, menos na unda e mester bay. Y esaki no ta trabao di mucha, ora nos ta topa cosnan tira den mondi cu ta bin directamente di un empresa… Pa colmo, e luga unda e sushi mester bay tambe ta un desaster, pa cual nos ta spera cu porfin lo bin un solucion permanente.

Otro aspecto mahos cu mester discuti ta e manera con nos pais a degenera den su gobernacion, unda cu ta parce cu fuera di e papel di cinco o dies florin na Censo, nada no ta bay di mes, tur cos mester ta un problema, a menos cu bo paga… Si nos kier duna honor na nos bandera, na nos himno, anto nos mester cuminsa cu exigi pa trata nos tur igual. Mescos cu ora nos ta canta e himno hunto, unda diferencia di religion, sexo, rasa y color politico ta irelevante, den bida di tur dia nos mester lucha pa na e momentonan ey tambe ta cumpli cu igualdad di trato. Nos ta spera sinceramente cu dentro di poco e plannan pa cuminsa e proceso di restauracion di respet y integridad lo keda implementa. E ora ey ta bira mas facil pa nos siña nos yiu y nietonan cu amor pa patria ta ora bo ta haci lo corecto, tambe sin bandera na bista, sin scucha himno.