Kico formacion di gabinete… Por siña nos…

Nos ta habri aña 2025 cu un formacion di gobierno nobo andando. Detaye con esaki ta bay no ta conoci ainda, pero ta bon pa reflexiona tocante loke nos por spera. Esaki pasobra mas tanto expectativa ta halto, pa despues converti den decepcion pasobra e resultadonan di e gobierno nobo no ta loke publico tabata spera. Esey ta depende grandemente di e plan di gobernacion cu finalmente ta keda acorda. Pero tin otro asunto pa tuma na cuenta den e proceso di formacion, cu por indica si realmente tin algo cambiando. Tur gabinete ta pretende di ta e inicio di algo unico, algo nobo nunca visto. Y tin cierto señal cu por indica cu di berdad algo ta cambiando, of no. Nos por ripara esey na e eventual repiticion di erornan di pasado, o un claro rechazo di continua cu esakinan. Por ehemplo, kico ta haci cu e composicion final di e ministerionan? Nos sa cu desde hopi aña caba den formacion di gobierno no ta tene cuenta mas cu cierto logica den e composicion di e ministerionan, aunke esey inicialmente, na 1986, tabata e pensamento formando e ministerionan segun cierto criterio relaciona cu e tareanan specifico cu nan tin, cu ta toca otro riba cierto tereno y por lo tanto tin cierto relevancia poniendo nan hunto.

Sin embargo, sigur den e caso di formacion di gobierno di coalicion, oportunismo politico a vence y a bira algo normal cu den formacion ‘tur opcion ta riba mesa’. E negociacion den e estilo aki en berdad ta contribui na e ‘flexibilidad’ na mesa pa por yega na un gabinete, pero mas cu un biaha ta surgi combinacion di cartera cu ta desafia logica completamente. Por ehemplo, e separacion di asunto economico y turismo. Si sector turistico ta abarca gran parti di bo economia, kico ta e pensamento tras di pone e resto di e tareanan riba tereno economico den man di otro mandatario? Nos a yega di tende e argumento cu “turismo ta asina importante cu e mester ta opera riba su mes…” Nos ta confirma cu turismo ta e sector economico mas importante, pero esey segun nos mester ta hustamente un argumento pa fortifica e maneho economico en general treciendo tur tarea di economia hunto. Con bo kier tin un maneho solido, si un mandatario ta delibera cu inversionista tocante nan plannan, cu mas tanto ta toca turismo, mientras e otro mandatario supuestamente mester hiba un maneho pa esaki. Lo no ta mas facil pa mantene tur esaki, ademas di e control riba e forma di opera di empresa, den man di e mesun mandatario? Aki sigur tin persona cu lo bisa cu ta bon pa tin e control y supervision di empresa den otro man, pasobra…? Pasobra kico? Pasobra e ministro a bira ‘demasiado bon amigo’ cu e empresanan grandi den e sector ey, cu mester un otro pa actua cu man duro, ora mester? Si ta asina ta argumenta, anto nos mester propone pa tur tarea di supervision bay den man di un colega, mientras tur ta haya supervision riba otro… Asina nos kier goberna? Lo ta un novedad internacional…

Tin otro caso di separacion cu finalmente a bay completamente robez. Ta trata di e ministerio original di asunto social, labor y enseñanza. Durante varios gabinete a mantene e tres tareanan aki hunto, pero despues den e afan menciona pa tene tur opcion riba mesa, a cuminza cu e separacion. Aparentemente enseñanza ‘por arte de magia’ a resulta asina grandi cu e mester a bay pa un ministro separa. Esey tabata a base di experiencia di mandatarionan den pasado cu no por a maneha enseñanza bon? Nunca nos a tende esey. Pero en todo caso, enseñanza separa anto, pero pakico labor y asunto social den diferente ministerio? Nos por a ripara den e ultimo gabinete aki, cu asunto social a bay bao di husticia, mientras un tarea di husticia (Dimas) a bay bao di e ministerio cu tabata maneha labor. E argumento no tabata cu nan por a controla otro mihor asina, sino cu esun tabatin mester di un parti di husticia pa hiba su maneho mihor. Con esey a funciona, nos tur sa… Ta altamente recomendable anto pa no laga e tipo di anomalia aki bolbe den e proximo gabinete, aunke lo por tin cierto candidato pa ministro cu ta desea di purba nan suerte, ripitiendo e combinacion absurdo aki.

Otro idiotez cu lo mester kita for di caminda ta e peso inaceptable cu e ministerio di asunto general a haya durante e ultimo gobierno. Aparte di e carteranan cu na ultimo a bay pa e promer ministro, pa motibo di retiro di otro ministro di su gabinete, el a encarga su mes cu e cartera di infrastructura y planificacion, aparentemente dunando e impresion cu no tabata prudente pa duna ningun hende mas un oportunidad pa ‘echa baina’ cu e tentacionnan cu e cartera ey semper ta representa. Nos tur sa con esey a termina, cu nombramento na e puesto di director di e siguiente persona cu a bira obheto di investigacion penal pa fraude y corupcion, den un ministerio cu a conoce caba dos caso di ministro cu a aparece dilanti huez y un director suspendi cu ta bringando actualmente su caso disciplinario den corte, despues cu no tabatin base pa e caso penal. \

Kico ta anto e señal cu algo lo cambia den sentido positivo? Si e proximo gabinete ta duna señal di seriedad, lagando atras e mal custumbernan acumula den trinta y pico aña di gobernacion, y asina no malogrando trabao gubernamental pa acomoda oportunista.