(AP) – Si reguladornan di gobierno prevalece contra Google den e huicio anti-competencia mas grandi na Merca den 25 aña, probablemente esaki lo trece cambionan drastico cu lo socava e dominio di un motor di buskeda cu ta defini internet pa biyones di persona.
Mientras e huicio di 10 siman investigando practicanan di negoshi di Google ta yega su punto medio, ainda ta mucho trempan pa bisa si hues Amit Mehta ta bay tuma partido pa Departamento di Husticia y purba di boei un di e companianan tecnologico mas dominante na mundo.
Si Mehta duna veredicto cu Google tabata manehando un monopolio ilegal den buskeda, e castigo por habri avenidanan online nobo pa consumidor y negoshi explora den buskeda di informacion, entretenimento y comercio.
Motor di buskeda di Google a gana su share enorme di mercado door di cas instantaneamente presenta hende cu informacion util busca for di e biyones di website cu ta indexa desde cu ex-studiantenan graduado di Universidad di Stanford, Larry Page y Sergey Brin a desaroya e tecnologia durante añanan 1990.
Ademas di su magia tecnologico, Google tambe ta paga biyones di dollar cada aña pa sigura cu su motor di buskeda ta e escogencia default pa contesta pregunta cu ta hinca den e browsernan mas popular pa smartphone y web browser.
E acuerdonan aki no ta evita cu usuarionan por cambia na un motor di buskeda diferente den nan setting, pero ta un proceso fastioso cu masha tiki hende ta tuma e molester pa nabega. E realidad aki ta e motibo pakico Google ta dispuesto pa paga asina hopi pa e posicion privilegia, segun Departamento di Husticia.
E pagonan di Google pa posicion preeminente den buskeda – incluyendo como $15 biyon te $20 biyon pa aña pa Apple so – ta na cabes di e caso di Departamento di Husticia, haciendo probable cu e hues lo prohibi esaki si duna veredicto contra Google.
Si esey pasa, expertonan ta kere cu e solucion mas probable na Merca lo ta un rekisito pa smartphone y web browser mustra un palette di diferente motor di buskeda durante proceso di setup, algo cu ya ta haci na Europa, unda tur indicacion te awo ta cu mayoria di hende toch ta opta pa Google.
Esey por ta pasobra nan ta kere cu Google realmente ta e miho motor di buskeda – manera Google ta argumenta den nan defensa – of nan djis ta confia e marca mas cu opcionnan rival manera Bing di Microsoft of DuckDuckGo, enfoca riba privacidad.
Tanten cu e veredicto no exclui rivalnan di Google di paga pa ta e motor automatico den smartphone y web browser, Microsoft lo por cumpra e posicion pa Bing.
Pero un prohibicion total riba acuerdonan di buskeda default cu tabata altamente profitable pa Apple y otro companianan manera proveedor di wireless Verizon por tin consecuencia inespera, manera aumento di prijs riba otro producto popular.
Otro consecuencia di e prohibicion riba e acuerdonan aki ta cu Google lo por toch keda cu un bentaha dominante den buskeda si hende keda proactivamente scog’e, y e compania lo tin biyones di dollar mas pa gasta den otro areanan, placa cu antes tabata bay pa acuerdonan cu realmente no tabatin mester.
Maske e huicio ta enfoca riba e motor di buskeda di Google, un victoria di gobierno lo tin consecuencianan mas amplio den industria di tecnologia si Mehta dicidi cu tur setting default ta anti-competencia y haci tur e defaultnan den settings ilegal.
Un decision asina lo habri un buraco den e muraya digital cu Apple a construi rond di e iPhone pa duna su propio software y productonan manera Siri acceso exclusivo na e mas di 1 biyon usuario di e aparato, preparando escenario pa otro potencial bataya legal.
