Actualmente Heart Centered Leadership Foundation tin diferente proyecto cu ta haciendo pa nos hoben nan di Aruba. E fundacion tin un proyecto di Hulanda cu ta andando actualmente pa asina purba di preveni drop out na scol. Banda di e proyecto aki tin un otro proyecto cu ta andando cu yama Sustainable ME WE cu ta un proyecto cu lo trata di saca afo e potencial di nos hobennan pa asina nan por yega na nan metanan den bida. Sra.Siouxsie Kock ta director di e fundacion y lo bay duna un seminario cu lo ta un di e prome seminario cu lo ta den un nivel cu e hoben lo bay conoce su mes di ken nan ta y kico nan por haci y kico nan kier den nan bida. Loke cu a sali na cla despues di un investigacion cu a tuma luga ta cu solamente un grupo chikito di hoben nan ta participa na tiponan di eventonan asina, y mayoria di nan ta hobennan cu ya caba ta participa den eventonan di diferente proyectonan cu tin na Aruba. Sinembargo Heart Centered Leadership Foundation kier haya e grupo aki , pero tambe kier logra haya e gruponan cu ainda no ta yega na tipo di eventonan asina y cu nan ta mas vulnerable den nan sentimento y pensamento. Sra.Sioxsie Kock ta splica cu cada mucha cu participa na e proyecto aki lo bira mas consciente di kico ta loke ta stroba nan na e momentonan aki pa nan por logra nan meta. Tambe e hoben lo bay realiza partinan den su mes cu nunca kisas e tabata sa cu e tin e potencial ey y tambe e seminario lo yuda e hoben wak bida di un otro manera. Loke cu tahopi importante ta cu un hoben mester ta consciente cu kico cu por a pasa den su bida semper e tin un choice pa haci cambio. Tambe lo nan haya tools pa e hoben por sinta keto un rato wak unda e ta na e momentonan aki y mira e dos camindanan cu e mes por haci un escogencia di cua banda ta prefera pa sigui den bida. E hobennan cu por participa ta hobennan entre 17 bay ariba y tambe por ta pa adulto cu kier yuda guia hobennan den futuro.E seminario aki lo keda duna den vakantie di October cu lo tuma luga den 4 dia y lo tuma luga na Teresita center na San Nicolas. E muchanan lo ta presente for di mainta te cu anochi. Hoben nan cu kier haci algo pa comunidad of cu kier crece personalmente por acudi libremente serca Heart Centered Leadership foundation na telefon 5941211 y por haya mas informacion.
