Diahuebs awor, dia 18 di maart ta cumpli 45 aña di himno y bandera. Tocante esaki Bon Dia Aruba a dicidi di haci algun entrevista riba caya pa comunidad por conta kico e dia aki ta nifica pa nan y kico nan ta custuma di haci e dia aki.

Manera ta un custumber, Aruba tin un dia special durante cual ta conmemora su simbolonan patrio, como bandera y himno nacional, cu pa cada Arubiano ta nifica algo special. Y cada 18 di maart ta recorda e aña 1986, tempo cu Hulanda a acepta e derecho di Aruba su autonomia.

E ta nifica un fiesta pa celebra e recorido como nacion y tur loke e bandera di Aruba ta representa. Ademas, ta un dia pa disfruta un dushi cuminda crioyo y comparti den famia.

Glenda Richadson Kelly a comenta cu esun cu ta biba na Aruba y biba den cas di welanan bieu cu cunucu y cria bestia sa kico e dia aki ta nifica. Awor tin cu wak con e pais aki a desaroya y esey ta nifica hopi.

“Con cu bay bin, awor mes cu tin pandemia y hopi problemanan, e pueblo – sin importa si el a nace na Aruba of el a nace afo, pero ta biba na Aruba – e pueblo ta traha pa e adelanto di e isla”, Richardson Kelly a expresa.

El a contesta cu pa e dia aki, el a traha asina duro pa tanto aña cu e dia ey e ta bay cumpra cuminda crioyo, bay keiro rond y bay back su cas.

Igualmente, Niurka de Cuba a expresa pa Bon Dia Aruba cu dia 18 di maart ta un dia hopi special pa hende di Aruba. “E dia aki mi ta sinti mi mas orguyoso di mi pais, di mi isla, mas orguyoso di mi idioma, di nos bunitesa, di e hendenan cu ta biba akinan”, el a señala.

Esey ta loke e dia aki ta nifica p’e y na mesun momento ta e ora pa sinta, pensa y refleha un tiki over di tur e cos cu Aruba a pasa ultimamente y e aña aki sigur cu e lo bay ta un aña hopi diferente pero tambe esey por nifica algo bon, pa motibo cu esey por nifica mas tempo cu famia.

Door di e situacion el a sigura cu e lo percura pa keda mas sigur cu ta posibel kedando na cas y compartiendo cu su famia.

Luis Diaz, un persona cu nacionalidad Venezolano a sigura cu e tin algun añanan caba bibando na Aruba, pa e dia aki el a expresa cu e ta keda na su cas si e dia ey e no mester traha. “Mi ta compronde cu e ta un fecha importante pa tur Arubiano y pa e isla den general, pasobra nan ta conmemora e libertad y independencia a traves di simbolo como e bandera y himno nacional.”

Di mesun manera, el a bisa cu e tin conocemento cu tin celebracionnan cultural y tradicional, cu e isla tin un sentido di patriotismo pa loke ta trata e fecha aki. “Nos como Latino nos ta apoya e celebracion aki”, el a finalisa.

Mario Jimenez di nacionalidad Colombiano a splica cu e tin mas di 20 aña na Aruba y cu dia 18 di maart ta un dia hopi special, na unda e hendenan tin cu celebra e tradicion y fiesta aki. Di loke ta trata actividadnan, el a menciona cu “un persona como stranhero ta busca bay lama y come na restaurantnan.” Di mesun manera el a afirma cu el a asisti na celebracionnan cu a wordo haci añanan pasa pa loke ta trata e dia aki.

Alabes, Andres Seijas a expresa cu aunke e tampoco a nace na Aruba y e tin 25 aña bibando den isla e ta stima e pida di baranca aki y e ta considera su mes manera un Arubiano mas, 18 di maart pa su persona ta nifica libertad di e pais, ta forma parti di e cultura cu ta algo hopi importante di e pais aki.

El a menciona cu normalmente e ta bay bishita su famia, ta traha cuminda y ta asisti na un par di actividadnan cultural, aunke e aña aki pa via di pandemia no lo tin actividadnan pa evita aglomeracion di hende, el a sigura cu e lo bay celebr’e di un manera sigur.

Pa finalisa, Hubert Gomez a bisa cu 18 di maart ta un dia na unda tur Aruba ta celebra tur aña y ta nifica un recordatorio pa nos como Arubiano disfruta den famia, asina mes el a sigura cu cada hende tin un manera distinto pa celebra e fecha aki como por ehemplo, sali y dal un keiro pa aprecia e naturalesa di e isla bunita aki, pero cu e lo keda na su cas pa via di e pandemia cu a cambia hopi cos tambe.