E realidad financiero mes cu ningun autoridad Arubiano kier papia over di dje ta bastante scur. Miho nos no menciona cu mester hisa edad di pensioen, aumenta premie di AZV y introduci BTW di 15%. Tur e medidanan aki ta asumi un hecho cu ningun pero ningun politico, esta geel, berde of regenboog, aparentemente tin durf di papia over di dje, Cu ta pa hotelnan multinacional na Aruba cuminsa paga nan fair share, pa asina spaar nos pueblo di tanto medida cu lo mester bin si no haci esaki.

E ta algo asina obvio, cu jammer genoeg no tin e madurez cu nos lo spera di nos politiconan pa cuminsa e discusion aki.

Hotelnan tin ganashi hopi halto

Observando data publico financiero di 3 multinacional, esta: Marriot International Inc., Hyatt Hotels Corporation y Hilton Worldwide Holdings Inc., nos por observa cu den nan totalidad e 3 multinacional aki ta bastante rentable. Tur e data aki ta disponibel den grafico y visualisa via website “MarketScreener.com.”

Dus si nos simplemente wak e realidad di Aruba, cu e situacion financiero ta dificil y cu alrededor di mita di nos pueblo ta bao un bestaansminimum, nos mester pensa tambe unda lo saca fondo pa saco di regalonan di Sinterklaas cu tur politico ta priminti awo cu campaña a cuminsa.

Awo siguramente no mester bin cu impuesto demasiado halto, pero nos tur sa cu sector hotelero ta custumbra di haya tax holiday riba tax holiday. Tambe por nota den estudionan di Centrale Bank van Aruba, cu ya caba e “moral” bao trahadornan den sector di turismo no ta optimal. Nos ta wak fondonan social problematico riba termino mas largo y cu pueblo di Aruba ya caba ta enfrentando un tasa di impuesto-pa-GDP di nivel hopi halto mundialmente. Awo dicon nos no ta ni disponibel pa ni sikiera cuminsa un discusion riba e tema aki? Bezig ta wak e situacion sumamente grave cu nos ta aden.

Usa dividend tax di hotel pa entrada universal y subsidia pa energia solar

Si bin cu un dividend tax modesto, mi persona lo pensa pa usa esaki pa crea un fondo di entrada universal pa full Aruba. Esaki lo alivia hopi di presion den poder di compras. E lo reforsa actividad economico local, hisa salubridad y baha criminalidad. Esaki ta basa riba hopi y varios estudionan di entrada basico universal cu a tuma lugar na diferente lugar na mundo. Tambe e lo hisa entrada pa full pueblo sin desarma si tin por ehempel pensioen of trabao di salario minimo, of te hasta un entrada halto. Tambe door cu e ta un redistribucion directo, Gobierno no ta touch e placa aki den ningun manera. Dus gobierno no por malgast’e tampoco, cual semper AHATA ta nota den su publicacionnan.

Un parti cardinal di baha inflacion ta pa reduci prijs di coriente. Esaki lo baha gasto direct pa consumidor, pero tambe pa empresarionan y tambe hotel indirectamente. E ta un hecho asina tristo cu na Hulanda prijs di panel solar ta asina abao cu ciudadano ta usa nan pa traha cura di cas. Mientras cu Aruba bendiciona cu solo, no ta haci mas uso di energia solar.

Si nos kier nos isla prospera den un manera berdadero, mester cuminsa kibra tabu. Hotel mag di finalmente cuminsa paga nan fair share na Aruba, pa asina nos sirbi e sector aki den mihor forma tambe riba termino mas largo.