Parlamentario Arthur Dowers den e conferencia di fraccion di AVP a papia riba e anuncio haci door di Gobierno, unda cu a menciona cu a baha gasto. “Sra. Wever-Croes ta un persona cu nos conoce cu no ta papia berdad y mi a hasta comprende cu un tempo nan tabata yama e señora aki 1 april, pasobra hopi bes e ta bini cu cosnan cu no ta cuadra,” e Parlamentario di fraccion di AVP a mustra. Dowers ta señala cu WeverCroes a bisa cu el a kita 300 coordinador di sr. Eman y cu esey el a spaar 8 miyon. Pero loke cu el a priminti ta cu e lo baha e cantidad di Ministernan y e no a cumpli cu esey.
Awo e tin 8 Minister, un Secretario di Estado, dos Minister pensioen cu aparentemente ta cobra mas cu e Ministernan, pues no a cumpli cu promesa haci na pueblo. El a priminti tambe cu e lo reduci gasto den e Ministerionan y cu e lo no tuma medida contra pueblo. “Nos por a compronde aworaki cu lo tin un pakete di medida cu lo ta mas o menos 5% di BAZV y BBO. Nos tin entendi cu el a haci cierto palabracion caba cu Hulanda cu lo pone cierto medidanan.”
Tambe a wordo bisa cu el a kibra e contract cu sr. Eman tabatin cu Tera Group y aki Arthur Dowers a bisa cu e kier mira un copia di e contract aki pasobra cu e sa nunca prome minister Eman mes tabatin un contract cu Tera Group. Pa loke ta e huurnan di edificio cual contractonan el a kibra, e parlamentario ta bisa cu si e mandatario anula e contractonan di e edificionan den Vondellaan, cu ainda ta den huur, e lo por spaar hopi mas ainda den e gastonan di Gobierno. “Nos ta sigur cu su famia lo no hib’e Hues si e kibra e contracto cu nan.” Tur esaki pa evita di tuma tur e medidanan cu lo mester bini.
