Dialuna mainta minister di Husticia y Asuntonan Social, Rocco Tjon, a tene un conferencia di prensa. Durante e conferencia e mandatario a ricibi pregunta for di miembro di prensa tocante e tema di KIA, specificamente e proceso di con ta scoge pa laga algun detenido sali mas trempan pa motibo cu KIA ta mucho yen.

Minister Tjon a splica cu esey ta algo cu ta sucede di hopi aña caba, na momento cu KIA ta yen tin un formula cu ta ser usa cu ta determina ken ta bin na remarke pa por sali mas trempan. El a remarca cu esaki obviamente ta mara na diferente condicion y si viola e condicionnan lo mester bay back.

Pa loke ta e formula aki cu el a menciona, el a indica cu un di e criterianan cu ta ser evalua den e decision ta cu e detenido no por a comete un delito grave. Ademas di esaki nan ta wak tambe e cantidad di tempo di e castigo cu e detenido a sinta caba, e tipo di delito y nan ta wak tambe e comportacion di e detenido den KIA.

Adicionalmente tin consehonan cu ta ser duna pa esaki y consehonan ta bin di parti di KIA mes, di parti di Ministerio Publico y tin un comision cu ta analisa e consehonan aki y asina ta tuma un decision

El a enfatisa cu como minister, mirando e ley ta ancra di tal forma, no por desvia di e conseho cu ta sali di e comision aki.

Minister Tjon a trece dilanti tambe e inversionnan cu a ser haci na KIA. Pa loke ta inversion den e personal mes, el a indica cu tin metodonan nobo cu ta ser usa aworaki pa por garantisa di un miho forma cu un detenido ta resocialisa y reintegra exitosamente back den comunidad.

El a sigui splica cu aworaki tambe tin personal fiho na e seccion di hoben (jeugdafdeling). Esaki, el a resalta, ta yuda hopi pa loke ta e desaroyo positivo di e hobennan cu a comete un fout.

E mandatario a informa cu otro siman e lo reuni cu Secretario di Estado nobo, Zsolt Szabó, ken lo ta realisando su prome bishita di trabou pa Aruba, y otro islanan di Caribe Hulandes. E mandatario hunto cu e Secretario di Estado lo bishita KIA pa asina e mes por wak e estado di e institucion.

Minister Tjon indica cu tin un ‘business case’ (caso di negoshi) cu cual e United Nations Office for Project Services (UNOPS) ta bay yuda nan pa skirbi full e caso pa asina Aruba por yega na un prizon nobo.

El a reitera cu nan ta inverti den e desaroyo profesional di e personal, den e parti di cuido pa e detenidonan, pa cual aspecto tin mas actividad ta tuma luga aworaki. Den esaki el a menciona cu dos siman pasa mas di 50 detenido a ricibi certificado den diferente area.

El a agrega cu tin miho cooperacion den full e cadena pa loke ta trata e parti di salud mental y e parti forensico.

E di tres pilar cu mandatario a remarca ta e parti infrastructural y manera ya caba menciona nan ta ricibiendo ayudo for di e oficina UNOPS cu e ‘business case’ y di e forma ey gobierno pot in un miho bista di kico realmente ta papiando di dje ora cu ta referi na u prizon nobo, ki tipo di cuido kier duna, ki tipo di seguridad mester tin pa e diferente regimennan y obviamente tambe cuanto detenido por tin.

Minister Tjon a splica cu UNOPS a haci diferente tipo di ehercicionan aki rond di mundo y aworaki ta asisti Aruba pa concretisa e caso aki por yega na e preguntanan di ki tipo di KIA kier pa Aruba y cuanto e ta bay costa. Despues di esaki lo pasa over pa combersa cu Hulanda pa wak con ta logra haya financiamento pa logra haci esaki realidad.