‘KIA no ta un institucion pedagogico pa coregi nos hobennan recidivista’

“Den  nos opinion KIA  ta un prizon den cual bo ta kita libertad di e hobennan”, segun Seraida Pemberton kende  ta directora di Stichting Reclassering Jeugdbescherming.  E ta agrega cu KIA  no ta un institucion pedagogico, y  esey ta loke tin mester pa atende cu e grupo di hobennan recidivista.

E ta lamenta cu KIA como institucion coreccional pa nos hobennan no ta cumpliendo cu e meta aki. Mas di e 50% di e hobennan cliente di Reclassering ta recidivista. Nan ta hobennan cu, ya caba a cay cera un par di biaha, y nan ta keda ripiti y esaki ta e grupo dificil pa trece cambio den nan comportacion. Sra. Pemberton ta haya cu ta existi e necesidad di un institucion pedagogico pa no unicamente saca e hobennan aki for di comunidad, pero specialmente duna nan e guia y tratamento necesario. “Y esey KIA no tin.”

Proyectonan
Na 2017 Reclassering tin diferente meta su dilanti no obstante cu nan no a logra e fondonan necesario pa  bira realidad algun di nan proyectonan , entre nan e banchi electronico. “Nos ta keda traha todo por todo pa haci Aruba mas sigur.” Nan meta principal pa pone mas atencion riba nos hobennan recidivista, kiermen esunnan cu a cay cera; y tambe esunnan di riesgo hopi halto, ya cu nos hobennan ta nos futuro. Tambe nan tin diferente proyecto chikito interno cu nan ta bay traha riba dje pa logra e meta anuncia aki.

Sra. Pemberton  a bisa cu si tin un instancia of persona cu lo desea di contribui financieramente pa e proyecto piloto di e  banchi electronico por bira un realidad, nan ta hopi welcome pa acerca e fundacion aki. El a indica cu e pregunta cu e fundacion Reclassering mester di e ayudo  t’ey. El a bolbe haci un apelacion na comunidad, instancianan y gobierno pa yuda nan realisa nan proyectonan pa asina reenforsa e parti aki di comunidad

“E comunidad ta mesun debil cu e structura cu tin. Anto si bo tin nos hobennan, pone accento riba nos hobennan pasobra Reclassering ta deal cu hendenan mayor di edad tambe.”. E parti di e hendenan mayor di edad cu a confronta problema cu husticia y cu ta cliente di Reclassering tambe tin su desafionan ariba su mes.