Basicamente Conseho di Ministro di Reino tin awe dos asunto nan dilanti. Un ta e ley (LAft) adapta segun deseo di parlamento di Aruba, cu ta contene tanto e cambionan acorda entre gobierno di Aruba y di Hulanda, como e 40 cambionan haci a traves di un amienda den reunion. E ultimo cambionan aki ta haci cu Gobierno di Reino no ta e instancia supervisor (financiero) mas, sino Staten di Aruba. E contenido di e ley di supervision di Aruba ta(bata) den linea general e contenido tambe di e (consensus) Rijkswet riba supervision financiero cu ta vigente pa Curaçao y Sint Maarten.
Ta imaginable cu por pasa pa hinca e contenido di e ley di supervision den un Algemene Maatregel van Rijksbestuur (AMVRB), un Decreto Real (KB), mientras den un fase despues ta introduci e mesun contenido den un ley di Reino (Rijkswet) atrobe cu e contenido di e LAft, similar na e Consensus Rijkswet di Curaçao y Sint Maarten.
Tin un otro opcion riba mesa y esey ta cu Gobierno di Reino, riba conseho di CAft, ta duna un instruccion na gobierno di Aruba pa cumpli cu e asuntonan cu CAft a señala ultimamente y cu a conduci na un conseho di CAft recientemente pa duna e instruccion aki.
Esaki sin embargo, ta laga e asunto di e eliminacion di Gobierno di Reino den e supervision existente sin atende, loke ta parce improbable, ya cu ta esaki ta reta e autoridad di Gobierno di Reino y ta rekeri un contesta. Mirando e actitud di Knops diarason den Tweede Kamer, ta mas probable cu lo tin un medida di Reino pa restablece e supervision di Reino.
