Gobierno oportunamente, o talvez oportunisticamente, ta recuri na e lamento di no por actua diferente “pasobra a palabra cu Hulanda cu asina ta haci”. Esaki nos por ripara den e dianan aki den e caso di inversion di Afl. 16 miyon cu gobierno tabata kier a haci den planta di purificacion, pero cu segun expresion di nos promer mandatario no por a tuma lugar pasobra e colegio di supervision (CAft) lo a pone presion pa kita esaki for di presupuesto. Esey ta parce, superficialmente mira, un bon argumento cu por convence esnan menos informa. Otro cos ta pa argumenta esaki cu esnan cu ta na altura con e asuntonan aki ta hinca den otro.

Pa cuminza, CAft ta un organismo cu ta sirbi pa raporta y duna conseho na Conseho di Ministro di Reino, ministro di finanzas, gobierno y Staten di Aruba. Den e papel aki ta comunica cu e ministro concerni y cu conseho di ministro di Aruba, y ta supervisa desaroyo di e implementacion di presupuesto aproba pa Staten. Nos ta referi aki na articulo 2 di e ley di 2015, unda ta defini tarea y responsabilidad di CAft. Expresion di e hecho cu CAft finalmente ta responde, como consehero, na Gobierno di Reino, por mira den articulo 2 inciso 2, unda Gobierno di Reino, den comun acuerdo cu e ministro y conseho di ministro di Aruba, por stipula demas regla di maneho y duna instruccion general y extraordinario pa ehercicio di e tarea y facultadnan di CAft den cuadro di e ley aki. Pa bon comprension anto: den e ley di Aruba aki, gobierno di Aruba no por duna instruccion na CAft con pa haci nan trabao, pero lo mester tin un acuerdo cu Gobierno di Reino, cu ta duna tal instruccion.

Awor e practica di e trabao di e colegio di supervision. Den e cambio di ley cu a tuma lugar na december 2023 a introduci e normanan pa 2024 y siguiente añanan. Den esaki a acorda cu, segun articulo 14, inciso 2, bao di d, cu surplus mas grandi cu e 1% di GDP cu mester bay den su totalidad pa reduci debe, ta ser dividi 50-50% entre “reduci debe y inversion via kapitaaldienst pa stimula economia”. Esaki ta trece nos na e discusion si inverti den e plantanan di purificacion ta un inversion pa stimula economia. Por bisa cu esey, mira estrictamente, no ta un factor di estimulo di economia. Di otro banda, si no haci algo, y mas di un aña pasa ya e situacion di e plantanan, especialmente esun na Bubali, tabata critico, y esaki mientras tanto a bira un menaza directo pa continuacion di bon desaroyo economico. E mal operacion di e planta ta caba un estorbo cu efecto negativo riba parti di e sector turistico, principalmente esunnan den cercania di e planta.

Gobierno di Aruba ta bisa awor cu CAft a rechaza nan argumentonan pa pone e inversion menciona riba presupuesto. Esey ta zona straño pasobra CAft como consehero no tin ultimo palabra den e asunto aki. Den tur pleito y confrontacion cu tabatin cu Hulanda y CAft, no tabata hustamente un punto fuerte, politica y publicamente, si a bay den desacuerdo cu Caft y a defende e asunto aki te na Conseho di Ministro di Reino, como un inversion absolutamente necesario pa bon continuacion di e recuperacion economico di Aruba? Nos mester conclui anto cu nos gobierno no sa ki ora pa ‘scoge nan batayanan’? O nos mester kere cu e storia tabata un tiki diferente? Nos por mira den e cambio di ley di december 2023 cu a acorda cu gobierno di Aruba no por cera contrato cu lo ta un ‘PPP’ (Public Private Partnership), unda un partner priva lo por a diseña, implementa y administra henter e operacion di e plantanan durante y despues di e restauracion. Esaki ta e parti prohibi cu ta explicitamente den e cambio di ley, pa e peso cu e PPPnan existente tin riba presupuesto. Pregunta: acaso gobierno di Aruba a considera bay den un PPP cu un compania, pero ta Hulanda, no CAft, a bisa ‘No’? Un biaha mas, si gobierno di Aruba no tabata di acuerdo cu e consehero, pakico no a sigui atende e asunto cu e autoridad maximo den e ley di Aruba aki, cu ta gobierno di Reino? Dicon un gobierno local, cu na varios momento a mustra un insistencia, pa no yam’e soberbia, den e relacion cu Hulanda, awor na un tono yoron ta bin bisa nos cu nan a laga e consehero di nan mes y di gobierno di Reino duna nan ‘un laba, un strika’…? Como cu e organismo consehero aki no ta conoci pa reacciona riba e tipo di expresion aki, nos lo keda sin tende e version di nan banda.

Kico ta sucediendo awor anto? Gobierno a subi e caminda largo di crea un vehiculo empresarial, cu lo ta bao control di gobierno, pa asumi e tarea di inverti den mehoracion y administracion di e plantanan di purificacion. Nos no ta bisa cu esaki ta un forma inadecua pa atende e asunto, pero esaki a contribui innecesariamente na retraso inaceptable. Di otro banda, e organismo nobo aki ta duna puesto di nivel halto nobo, loke semper ta bonbini cerca gobierno(nan) cu ta comprende hopi bon e ‘necesidad’ di por aloca nan ‘hendenan di confianza’. Asina, segun conveniencia anto ta usa e argumento cu ‘mester a scucha di e amo y señor’, cu den e caso aki ta mal elegi, pasobra CAft no ta ‘His Master’s Voice’…