E ultimo dianan aki medionan di comunicacion tin bastante trabao cu e controversia entre e mandatario encarga cu infrastructura, desaroyo teritorial y medio ambiente, y e compania encarga cu procesamento di desperdicio di henter Aruba. Nan ta procesa y despues entrega e desperdicio paketa na Serlimar pa warda esaki te cu tin un solucion pa sigui procesa esaki. Segun e ministro e forma indica pa haci esaki ta un proyecto di incinerator, pa kima e desperdicio aki na Aruba mes. Recientemente e partner den e procesamento, Ecogas, a trece un otro alternativa dilanti, pa exporta tur e material aki, pa nan kima esaki como combustibel den industria di cement.

Awe nos no ta bay den e debate aki, kico lo ta e miho alternativa pa nos pais: kima aki o den exterior. Nos kier toca otro tema a base di e controversia aki, y esey ta e hecho cu den e discusion a surgi e documento clave: e convenio entre Serlimar y Ecogas. E documento aki ta contene loke exactamente e partidonan den e asunto aki a conveni. Y ora un persona caba di lesa e documento aki, e lo mester ta puntrando su mes ta pakico tabatin tanto debate anto. E documento ta duna bon cla kico e partidonan a palabra. Y for di e texto por saca conclusion cu conhuntamente a dicidi pa cobra cierto suma pa cierto servicio. Fin di discusion? Preferiblemente si, pero probablemente no. Nos ta haya e leve impresion cu no ta e famoso ‘tipping fee’ ta e problema, sino cu e partidonan ta cuminsa e bataya tocante e meta mas a largo plazo, cu ta e decision kico ta bay haci den futuro cu desperdicio na Aruba. E asunto di tipping fee aki no ta parce nos nada otro cu e preparacion pa e bataya cu ta bay bin.

Pero esey tampoco ta e topico di e editorial aki. Loke nos kier elabora mas ariba, ta cu henter e discusion a tuma un otro rumbo ora a aparece e piesa clave: e convenio entre e dos entidadnan unda ta formula exactamente kico a keda palabra. E ora tambe, tur discusion di ‘si pero el a bisa o haci tal o cual cos prome cu e esey’ ta bira futil y inutil. Lo unico cu ta interesante pa sa ta si e sumanan acorda ta refleha un prijs rasonabel pa e servicio ofreci. Den esey nos no por opina pasobra e calculacionnan ey ta keda confidencial. Tin momento cu como ciudadano bo mester confia cu tur esunnan envolvi y cu mester a percura pa un debido proceso, a haci nan trabao. Manera semper, nos no ta bay lanta sospecho si no tin prueba al caso. Pero si nos ta kere cu e efecto cu publicacion di e documento tabatin ta mustra con importante ta pa nos tin acceso na esakinan, como ciudadano, pa nos tin conocemento y pa nos opina, a base di hecho.

Si nos mira e documento aki, nos no ta mira absolutamente ningun motibo pa e keda scondi. Nos no ta mira nada aden cu lo mester a keda confidencial, cos cu por ta perhuicioso pa un di e partidonan den e convenio. Si e debate aki no a surgi, y cualkier ciudadano lo a trata di haya e documento via e posibilidadnan cu e ley concerni, e landsverordening Openbaarheid van Bestuur (LOB) ta brinda, probablemente lo a cuminsa henter un guera cu e ministerio concerni, argumentando di nan banda cu e documento ta un convenio entre dos entidad pafo di gobernacion y cu por lo tanto no por duna copia ni pone esaki disponibel pa revision. Nos lo contradeci esey, pasobra ta trata di e actividad di un entidad funda pa gobierno a traves di un ley, y ademas e actividadnan concerni ta toca directamente nos interes como ciudadano. Pero enfin, probablemente nos lo mester a hiba e caso pa LAR y corte pa eventualmente despues di varios aña y hopi mas florin posiblemente haya e documento aki. Algo manera a pasa cu Camara di Comercio cu a hiba un tipo di testcase den corte contra gobierno di Aruba pa haya e file di un proyecto bastante controversial e tempo ey. Henter e asunto a costa un proceso di mas di cinco aña, pa finalmente gana e caso y pone beslag riba propiedad di Pais Aruba, cu tabata e accionnan di AAA NV. Finalmente, KvK a laga e asunto te ey y a debolbe e accionnan, sin haya e famoso documentonan.

Segun nos impresion, no a cambia tanto den e actitud di gobernacion, independiente di e color politico cu ta na mando. Te awe ainda e idea ta, aparentemente, cu menos e ciudadano haya sa, miho pa e gobernante. Si no tin un disposicion pa cambia e mentalidad aki, lo ta bon pa avisa nos, anto nos no mester carga speransa tampoco cu algo ta bay cambia den e luga aki. Loke ta lamentabel ta cu net riba e tereno aki tin hopi cos cu por mehora sin cu esaki mester costa hopi placa. Compara cu tur e gastonan envolvi den crea Bureau Integriteit, Integriteitskamer, simplemente ‘open up’ y traha un lista di documentacion cu por ta disponibel libremente. Ki dia nos por cuminsa?