Awendia violacion di mucha ta birando un trend na Aruba, pa motibo cu no tin un castigo pisa pa esaki. Ningun hende no sa kico e dolor ta di un mayor cu su yiu ta wordo viola, mucho menos e trauma cu e mucha mes ta pasa aden. E mucha tin cu bay na man di psikiatra pa asina e por recupera, pero esaki no kiermen cu e mucha lo keda bon mentalmente. Kico husticia ta haci? Nan ta cera e pedofiel pa un par di aña of luna y cu bon comportacion e ta sali den menos tempo cu e castigo cu el a ricibi y ta bolbe viola un otro mucha, pa motibo cu e castigo no ta nada. Mi ta puntra minister di Husticia kico mas tin cu pasa pa hisa e castigo aki y baha duro riba e pedofielnan.
A caso pa menasa un ambtenaar ta mas grave cu abuso di un mucha cu tin su futuro dilanti di dje ainda? Tur gobierno cu sinta ta bisa mucha ta nos futuro, awo si bo no proteha e muchanan aki cu ta futuro di nos pais, kico lo pasa cu nan futuro, acaso ministernan a pensa esaki? Kico minister di Husticia ta warda pa pueblo mes of mayornan mes tuma husticia den nan man? Esaki lo pasa si no bin cu un solucion pronto. No ta husto pa e mucha cu ta wordo viola pa wak e persona aki sinta un par di aña y sali, aki bo ta mustra e mucha cu e no tin e balor y cu husticia no ta proteh’e riba su mes un isla.
Mi sa kico e situacion aki ta pa motibo mi tin un conoci cu a pasa den esaki, y e persona a viola su yiu di su 2 aña te cu su 5 aña . E pedofiel no a keda cera largo y apenas den dos aña despues el a sali liber y ta core rond di scolnan atrobe. Unda husticia a keda aki? E mucha a keda traumatisa, pero danki na Dios cu e tin famia rond di dje pa yud’e.
Wak e caso di e meneer Reginald Danies, su yiu a wordo abusa pa un sinberguensa y unda husticia a keda un biaha mas? Poco dia ey nan a laga e pedofiel den libertad pa motibo cu nan di no tin prueba. Awo mi ta puntra mi mes si Ministerio Publico (OM) y minister di Husticia ta tuma e kehonan aki serio pasobra nos ta papiando di e muchanan cu ta futuro di nos pais. Awo nos a haya e homber A. S. L. aki sunu cu su yiu di criansa den auto. Manera mi a compronde di noticia, cu esaki no ta prome biaha cu e acto aki ta sosode y el a wordo laga den libertad na varios ocasion. Kico lo sosode cu e meneer aki, lo e haya un castigo pisa awo si cu nan a hay’e den e acto aki, of e lo wordo laga den libertad atrobe pasobra manera semper, supuestamente no tin prueba?
Esaki por ta bo yiu, bo sobrina, bo prima of amistad y ainda minister di Husticia no ta bringa pa nan. E abuso aki contra di nos muchanan tin cu stop. E muchanan aki ta keda trauma y hasta algun ta bay den mal caminda. E muchanan ta nos futuro di mañan, e castigo pa pedofielnan tin cu wordo papia awo den nos parlamento pasobra si nan por pasa amiendanan cu no ta dje importante ey, nan por pasa uno cu si ta proteha nos muchanan di sinberguensanan cu ta cana rond.
Ministernan habri boso wowonan pasobra e casonan aki no ta un joke y ta daña bida di un mucha chikito.
Skirbi pa Nicola Gonzalez
