Ayera mainta, minister di asunto social, Glenbert Croes (MEP) a lamenta cu e echo cu e crisis social cu nos pais ta pasando aden, a cobra otro victima. El a expresa palabra di forsa na e famia di e señora cu a bira victima di violencia domestico. Tambe el a condena categoricamente e echo aki, y el a pidi pa husticia bin cu pena maximo contra e abusado of criminal.

Burocracia y critica reino Hulandes
Pero e mandatario tambe a cuestiona cu pa motibo di un proceso burocratico ainda gobierno no por a start debidamente nan plan pa atende e crisis social aki. Esaki a pesar cu tur e departamento cu ta hinca den e plan aki ta trahando duro. E no sa te na unda e discusion burocratico riba canalisacion di e fondonan pa e diferente instancia envolvi den e plan social ta bay sigui.

Segun e mandatario, un di e criticanan mas grandi cu e ta hayando riba e crisis plan social ta uno den reino Hulandes. E critica tin di haber cu e cantidad di personal profesional cu nan mester emplea. Pero e ta haya cu si no tin suficiente personal cualifica pa atende e tipo di denuncianan aki, violencia domestico ta bay keda un problema. E esencia di e crisis social ta ora cu e hende ta haci un denuncia, nan por actua di biaha. Ya cu e lista di spera pa e casonan ta birando mas. “Ora bo ta haci un denuncia tin shen caso dilanti bo, mi ta sigur di e mesun gravedad.”

E mandatario a cuestiona e echo cu den reino Hulandes tin e tendencia di discuti riba crisis financiero, cumplimento di norma di CAft, norma presupuestario. Pero mientras loke ta mas grave cu e crisis financiero ta e crisis social. Esaki ta e punto e ta haya cu como comunidad den reino Hulandes nan mester realisa, ya cu e fenomeno aki no solamente ta presente na Aruba, sino den otro partner den reino, manera Corsou, Bonaire, St. Maarten, Saba, Sint Eustasius, te hasta na Hulanda mes.

E minister tabata energico pa señala cu den reino ta keda cu e tema di e crisis financiero ignorando e crisis social cu ta herbiendo y cu ta birando un bom cu ta bay destrui y daña fibra di balor, norma y pensamento di nos pueblo. Di ki bal cu nos por tin un presupuesto perfecto pero un pueblo totalmente destrui den su biba. “Esey ta loke reino Hulandes kier para p’e.”

E ta haya cu e factor burocratico aki ta impedi nan acelera implementa e plan aki urgentemente. “Pa nos alivia e presion social cu ta afectando nos comunidad di evita di actua na tempo”, e di. E ta haya cu entre mas tarda e implementacion di e plan aki, mas consecuencia ta bay bin. Aunke tin instancia cu por atende cu e tipo di caso asina, pero e atencion no ta uno diligente pa falta di recurso di personal. E ta haya cu mientras cu un denuncia ta drenta tin 12 caso su tras casi di e mesun indole di violencia domestico, unda nan ta batiendo emergencia. Pero nan no tin suficiente personal pa atende nan.

Reunion
E unico solucion cu e mandatario ta mira pa evita cu casonan di e indole aki, y tambe di e dos mucha cu a conmove henter nos comunidad, ta acelera e implementacion di e crisis plan social.

Esaki ta un asunto cu diahuebs awor den seno di conseho di minister nan ta bay atende. Tambe tin reunionnan cu su ministerio a convoca inter-ministerial cu diferente instancianan pa cuminsa actual.

E ta comprende cu pa prome biaha ta wordo implementa un plan di e magnitud aki. No solamente cuerpo policial, Ministerio Publico (OM) ta forma parti di e plan aki, sino aliado importante tambe como Departamento di Asunto Social (DAS), fundacionnan, otro departamentonan manera Directie Voogdijraad, departamento di Salud, ya cu esaki ta un asunto di nos tur.

Cultura di silencio
Pero e ta haya cu loke a pasa cu e ultimo caso di violencia domestico, ta emblematicamente un reflexion pa nan cu ta encarga cu e crisis plan social.

E mandatario ta haya cu si e situacion aki lo sigui asina sin cu nan no por implementa e plan aki. E lo cuminsa punta dede riba esunnan cu mester carga e responsabilidad pa e tardansa aki. E ta admiti cu eventualmente e crisis social aki ta un problema cu ta bin di decadanan atras, pero aworaki pueblo a eligi e gobierno aki pa actua, y nan mester trece solucion.

Tambe e mandatario a condena loke el a cualifica como cultura di silencio rond di e caso di abuso domestico. Nos comunidad –segun e mandatario- mester actua mas diligente riba casonan asina, y no neglisha nan, y evita di bira un comunidad apatico. “Nos como comunidad mester bay haci algo totalmente diferente. E biba cu nos tabatin ultimo 20, 30 pa 40 aña aki, nos mester bay compronde cu nos no por sigui tolera e biba y e conducta ey.”

E ta spera cu e preocupacion cu el a trece dilanti ta uno cu pueblo henter ta consciente di dje. No solamente na nivel di gobierno y instancianan, pero henter nos comunidad.