KFC ta purbando di crea e prome chicken nugget traha den laboratorio, parti di su concepto ‘restaurante di futuro’, e compania a anuncia. E cadena di restaurant di galiña lo traha cu compania Ruso, 3D Bioprinting Solutions pa desaroya tecnologia di ‘bioprinting’ cu lo ‘print’ carni di galiña, usando cel di galiña y material di mata.

KFC tin plan di provee ingredientenan manera paneermeel y specerij na e compania di bioprinting, ‘pa logra e sabor iconico di KFC’ y lo busca replica e sabor y textura di galiña di berdad.

Mester remarca cu e proceso di bioprinting cu KFC ta describi ta usa material animal, pues cualkier nugget cu produci no lo ta vegetariano. Na algun di su restaurant sinembargo, KFC si ta ofrece opcionnan vegetariano; aña pasa a converi den e prome cadena di fast-food Mericano pa test e producto di galiña basa riba mata di Beyond Meat, cual tin plan di lansa na mas di su restaurantnan e berano aki.

Nugget bioprinted lo ta miho pa medio ambiente cu carni di galiña standard, KFC ta bisa, citando un estudio di American Environmental Science and Technology Journal, cu ta bisa ta mustra e beneficio di crece carni for di celnan, incluyendo reduccion den emision di gas di invernadero y consumo di energia compara cu metodonan tradicional di criamento di bestia.

“Tecnologia di 3D bioprint, incialmente reconoci ampliamente den medicina, awendia ta hayando populardidad den produccion manera di carni”, segun Yusef Khesuani, co-fundador di 3D Bioprinting Solutions den un declaracion. “Den futuro, e desaroyo rapido di tecnologianan similar lo permiti nos crea productonan di carni 3D-printed di forma mas accesibel, y nos ta spera cu e tecnologia crea como resultado di nos colaboracion cu KFC lo yuda acelera lansamento di productonan di carni basa riba cel den mercado.”

3D bioprinting ta un proceso slow y dificil. Maske tin algun desaroyo prometedor den su uso pa medicina. Investigadonan na Universidad di California Berkeley trahando riba un proceso pa bioprint organonan humano pa transplante, aña pasa a nota cu material biologico ta deteriora prome cu por completa e proceso. Nan metodo a rekeri pa freeze e material biologico mientras ta print esaki. Expertonan ta kere cu ainda falta hopi prome cu por usa 3D bioprint pa crea organonan funcional pa pashent di transplante, sinembargo.

KFC ta bisa cu su nugget di bioprinting lo ta disponibel pa un test final na Moscu e herfst aki. E anuncio no a detaya con e proceso cu ta test actualmente na Rusia ta diferente di otro esfuersonan di 3D bioprinting, pero a bisa cu ‘no tin otro metodo disponibel riba mercado cu por permiti e creacion di productonan asina compleho for di cel animal’. Ainda no a revela ki tempo e nuggetnan en cuestion lo ta disponibel pa clientenan saborea.