(AP) – E actor ganador di Oscar Kevin Spacey, a nenga e acusacionnan nobo di comportamento inapropia di e hombernan cu lo participa den un documentario riba television Britanico cu lo lansa proximo siman.
Den un entrevista online cu reportero Dan Wootton, Spacey a bisa cu nunca el a haci nada ilegal y a admiti cu el a lucha pa bolbe back trabao despues cu aña pasa a retira e acusacionnan criminal den su contra na corte di London. “Mi no por pasa door di esaki atrobe, permiti mi mes ser ataca sin cu mi defende mi mes,” el a bisa den e entrevista cu a keda publica diabierna riba Wootton su Youtube.
Juli ultimo, un hurado di London a retira e acusacionnan contra Spacey di agresion sexual cu ta bini for di 4 hende homber desde 20 aña atras. E victoria den corte tabata e di dos desde cu el a gana un demanda di 40 miyon dollar den 2022 na New York cu a ser treci dilanti pa actor Anthony Rapp.
E documentario yama “Spacey Unmasked” lo lansa dia 6 y 7 di mei na Britania y lo stream na Merca.
E documentario aparentemente lo tin testimonio di 4 hende homber pa loke ta trata eventonan entre 1976 y 2013, e actor a revela durante e entrevista.
“Mi ta tuma responsabilidad completo pa mi comportamento den pasado y mi accionnan, pero mi no por y no lo tuma responsabilidad ni pidi disculpa na ningun persona cu inventa cosnan tocante mi persona of crea storianan exagera tocante mi persona,” Spacey a bisa, ken a gana Academy Award pa “The Usual Suspects” y “American Beauty”.
“Nunca mi a bisa ningun hende cu si nan haci fabor sexual pami, mi lo yuda nan cu nan carera. Nunca,” el a declara.
