(AP) — Actor Kevin Spacey a declara inocencia weekend ultimo pa cargonan di a abusa sexualmente di tres homber mas cu un decada atras, y el a wordo bisa cu e ta bay ta den huicio proximo aña.
Spacey, di 62 aña di edad, a para riba e dock a papia claramente mientras el a contesta ‘inocente’ na cada un di e cinco acusacion durante un audiencia na Corte Criminal Central na London, conoci comunmente como e Old Bailey.
Hues Mark Wall a pone e fecha di dia 6 di juni 2023 pa e huicio cuminsa, y a bisa cu e lo dura entre tres pa cuatro siman. Ta probable cu e huicio lo tuma lugar na Old Bailey, e sitio pa e huicionan criminal di perfil mas halto di Reino Uni.
E ex-strea di House of Cards, kende a dirigi e teatro Old Vic na London entre 2004 y 2015, a rechasa cuatro cargo di abuso sexual y un cargo di causa un persona pa participa den actividad sexual penetrativo sin permiso.
E incidentenan supuestamente a tuma lugar na London entre maart 2005 y augustus 2008, y un na occidente di Inglatera na april 2013. E victimanan awo ta den nan 30 y 40 aña di edad.
Abogado di Spacey anteriormente a bisa cu e actor ‘fuertemente ta rechasa’ e acusacionnan.
Spacey, kende tin adres na London y na Merca, a ricibi fiansa y a wordo permiti pa bolbe Merca despues di un audiencia preliminar luna pasa. E hues a continua e fiansa incondicional riba diahuebs, y a bisa cu ta bay tene otro audiencia prome cu e huicio na 2023.
Spacey a gradici e hues na final di e audiencia di 15 minuut. E no a duna comentario mientras e tabata bandona e corte y tabata siendo dirigi door di un multitud di fotografo y team di camara na un auto conduci pa chauffeur.
Spacey a gana un Premio di Academia como miho actor di reparto pa e pelicula di 1995, The Usual Suspects, y un Oscar pa actor principal pa e pelicula di 1999, American Beauty. Pero su carera celebre a conoce un paro abrupto na 2017, na momento cu actor Anthony Rapp a acusa e strea di a atak’e na un fiesta den añanan 1980, tempo cu Rapp tabata un adolescente. Spacey ta rechasa e acusacionnan.
Spacey ta enfrentando un demanda civil separa pa abuso sexual for di Rapp na corte federal na New York, Merca.
