Di fuentenan nutritivo pa bo no bay desbalansa bo curpa y asina mantene bo mes saludabel

Keto Lifestyle’ ta un estilo di bida cu ta hopi popular mundialmente, pero na Aruba poco hende ta familiarisa cune. Alexa Werleman, Alexa’s Keto Vibe, ta un health coach cu a specialisa den e Keto lifestyle. E ta conta nos kico en realidad Keto ta encera y con e mes a cuminsa su practica di health coach Keto.

Alexa ta conta cu semper nos a wordo indoctrina cu vet ta malo y for di e punto di bista ey tin hopi hende ta pensa cu vet ta malo y cu pa por tin un estilo di bida saludabel mester elimina vet. Pero en realidad esey no ta e idea. El a splica cu locual cu en realidad ta malo, y awendia tin tanto malesanan cronico ta bin dilanti, ta basicamente pasobra e tipo di carbohidrato combina cu nos ta come combina cu vet ta locual cu ta haci nos malo.

“Si nos mira bon e vetnan cu nos por come ta e vetnan animal, mas cu claro tin diferente tipo di vetnan aworaki cu ta wordo procesa y geneticamente modifica cu tampoco no ta bon pa nos sistema, pero basicamente, e obhetivo di Keto ta cu bo tin cu corta carbohidrato casi por completo y bo ta cambia bo metabolismo e ora ey”, el a indica.

El a splica cu normalmente un curpa humano ta wordo siña for di momento cu e cuminsa cunsumi cuminda cu e tin cu depende di carbohidrato pa tin energia pa por funciona. Cu e Keto lifestyle e persona ta cambia su curpa, “biohacking” e ta yame, pasobra e ta obliga su curpa busca un otro fuente di energia y en realidad ta cambia su metabolismo.

“E siguiente fuente di energia ta bira vet y eynan ta unda e magia ta cuminsa pasobra e ora ey bo curpa ta bay kima vet pa e por funciona. E no ta simplemente un dieet cu bo ta bay corta consumo di caloria na un minimo y esey te. Cu Keto bo ta corta caloria berdad pero bo tin cu duna bo curpa calidad den caloria. E proposito no ta pa come lechuga henter dia pasobra eynan bo no ta nutri bo curpa. E triki den Keto ta cu bo mester sa di unda bo calorianan ta bin, di fuentenan nutritivo pa bo no bay desbalansa bo curpa y asina mantene bo mes saludabel”, Alexa a splica.

El a señala cu sucu tambe un problema grandi pa por tin un bida saludabel y hopi hende no ta realisa esey. El a remarca cu cientificamente a keda comproba cu sucu riba su mes tin un efecto den e cerebro humano cu ta wordo compara cu e efecto cu cocaina tin den e cerebro. Locual ta demostra con peligroso consumo di sucu ta pa un hende.

“Sa kico bo tin cu come, con bo relacion cu cuminda mester ta y pa esey simplemente bo tin cu comprende kico cuminda ta eigenlijk”, el a enfatisa. Alexa a señala tambe cu awendia un problema hopi grandi ta cu hopi hende ta come djis pa come y no ta come cu e pensamento pa nutri e curpa.

“Si bo wak bon nos ta come emocionalmente. Nos ta asociando cuminda cu emocionnan tambe y eynan ta caminda bo ta wak cu tin hopi obesidad. Hopi persona obeso tin diferente grado di depresion y con nan ta yena e bashi ey pa un rato so ta door di come. E ora bo ta haya e loke nos ta yama ‘binge eating’ y ‘emotional eating’ cu mi ta haya masha hopi den mi practica y ta unda cu mester cuminsa siña e personanan aki cu no mester relaciona comemento na emocionnan. Ami personalmente ora mi a compronde esey, e ora mi por a cuminsa cana e caminda pa mi cambia mi estilo di bida tambe”, el a bisa.

Alexa ta conta cu el a cuminsa cu e estilo di bida Keto pasobra e tabata pisa 120 kilo mas o menos y e tabatin hopi problema di salud, hereditario y no hereditario. El a sigui conta cu mama for di su 30 y algo aña a cuminsa sufri di presion halto y curason, y ora el a cumpli e edad ey, e mes a cuminsa sufri di mesun problemanan ey tambe y agregando na esey el a conta cu semper e tabata un mucha obeso y desde cu e tin tino e tabata sufri di anemia y calcium abao den sanger.

“Ora cu mi a pasa 30 aña mi a cuminsa sufri di presion halto of hopi abao door cu mi sanger tabata hopi abao mi presion tabata baha of subi bay halto, mi tabatin problema di colesterol, mi sanger na dado momento a bira hopi abao, dus mi tabatin hopi cos. Mi ta corda mi dokter a bisami cu mi tin cu haci algo pasobra mas cu mita di e problemanan cu mi tabatin mi por evita si mi haci algo cu mi peso. El a bisami cu sobrepeso ta locual cu ta haci cubo por mata bo mes hopi mas lihe”, Alexa a conta.

Na e momento ey Alexa a cuminsa train na gym y e ta conta cu su trainer e tempo, cu ainda ta su trainer, tabata tine ariba algun plan di cuminsa cu e no tabata por logra mantene. E tabata sufri hopi buscando e plan di nutricion cu ta pas pe y su trainer a menciona Keto. Asina Alexa a cuminsa investiga mas tocante Keto y despues di haya tur e informacion el a cuminsa cu Keto y a bay hopi enfoca riba dje.

E ta conta cu e ta corda e prome luna cu e mester a bay su dokter di cas pa su resultadonan di sanger y nan tabata teribel. “Mi a bise mi tabata cuminsando cu e dieet Keto y despues di dos luna mi a bay haci e testnan di sanger atrobe y mi dokter a keda impresiona, mi mes a keda impresiona pasobra mi a baha hopi y pa prome biaha den hopi aña tur mi testnan di sanger tabata normal. Eynan ta caminda mi a namora di e Keto Lifestyle”, el a agrega.

Alexa ta conta cu e comienso di su practica como health coach a bin sin cu el a planie. Simplemente hendenan tabata wak con hopi el a baha y con bon e tabata mustra, no solamente fisicamente, pero hopi hende tabata bise cu e tabata straal uit un alegria cu prome e no tabata mustra. “E cambio tabata interno y externo y hopi hende a ripara esey”, el a remarca

Pa e por a pone den practica locual e tabata siñando el a cuminsa yuda su amiganan mas cercano. Despues di un tempo, sin pensa, un persona sin pensa un persona a tuma contacto cune riba Facebook a pidie pa yude y lo paga pa e trabou y atencion. “Eynan e mes a dunami e idea, e mes tabata manda hende pa mi yuda nan y asina el a bira algo cu mi tabata haci hopi, el a cuminsa bira mas grandi”, el a bisa.

Aworaki Alexa ta traha tempo completo como un Health Coach y ta yuda tur persona cu ta desea di mehora nan estilo di bida, cu ta desea di mehora nan relacion cu cuminda of cu simplemente kier baha peso logra nan meta pa medio di Keto Lifestyle.