Un biaha mas e construccion di hotel Secrets na Sero Colorado ta capta atencion di tanto turista como local ariba rednan social. Diadomingo atardi un pagina di Facebook a publica un potret di Baby Beach riba cual por mira e construccion andando di hotel Secrets den e bisindario aki. E publicacion aki a haya hopi atencion y hopi usuario a expresa nan opinion ariba e situacion aki.

No ta prome biaha cu un potret di e construccion di Secrets Hotel ta haya atencion ariba rednan social. E biaha aki no ta excepcion y e publicacion aki a haya casi 200 comentario, den su mayoria expresando nan malcontento y decepcion pa e construccion di e hotel aki na un area na unda hopi tabata disfruta di e naturalesa.

“Ki dia nan ta bay stop di daña e bunita isla aki? Stop di construi hotel y condos,” un usuario a comenta. “Loke antes tabata un localidad bunita sin daño na Aruba a ser destrui den hopi manera,” otro a indica.

Pa turistanan cu tin hopi aña ta bishita Aruba e ta un tradicion pa bishita Baby Beach y disfruta di e trankilidad di e beach aki. Pero pa hopi aworaki e construccion di e hotel nobo ta nifica e fin di e trankilidad cu nan tabata disfruta di dje, e fin di e bunitesa y naturalesa cu tabata rondona e area aki.

“Hopi mahos mes. Anto prepara pasobra ora e hotel keda cla nan ta coy mita di e beach pa nan anto ayo beach publico,” un usuario local a comenta.

E preocupacion di desaroyo di hotelnan ta crece entre ciudadanonan. Pa demostra nan malcontento riba e topico aki un grupo di ciudadano a presenta na e acto protocolar di Dia di Rey na Wilhelmina Park na unda nan a protesta pasivamente y tabata carga posternan cu e slogan ‘No More Hotels’, entre otro, riba nan.

A pesar cu Gabinete Wever-Croes a indica cu nan no a otorga ningun permiso pa construccion di hotel, cu excepcion di Secrets hotel, y cu nan a traha pa negosha un reduccion grandi den e cantidad di cambernan di hotel cu ta wordo construi, ciudadanonan ta keda disgusta pa e impacto negativo cu e construccionnan cu ta andando tin riba e medio ambiente y ta keda haci yamado na gobierno pa interveni.