WILLEMSTAD – Algun luna pasa minister di VVRP a splica cu lo bini un pad pa cana keiro for di megapir den direccion di Otrobanda, pero den e area aki actualmente ta practicamente imposibel mirando cu ta un holo hopi malo ta bini for di e area caminda tin e palo di mangelnan.
E awa na Pater Euwensweg ta hole stinki pa motibo di bashamento di awa sushi, entre otro di e hospital cu ta pega eynan. Entretanto tambe Hospital nobo ta practicamente cla y te ainda no a haci nada cu e holo aki.
Segun Servicio di Obra Publico e cas di pomp pega ey ta kibra y asina no por hiba e awa sushi pa e instalacion di purifica awa na Klein Hofje. Servicio di Obra Publico a laga investiga e tera abou di e mangelnan den area di Ref, como preparacion pa construccion. E resultadonan di e investigacion aparentemente ainda no ta conoci.
Durante un anochi di informacion na Otrobanda, a splica habitantenan y tur esunnan presente cu e awa y ref ta den conexion cu lama habri, pero tin tiki coriente.
Miyones pa limpia
Tin un plan tecnico cla, e coordinado di e proyecto na nomber di e ministerio di TTPE, a yega di bisa cu e gastonan total pa henter e proyecto Ref cu ta consisti di sanacion y re-ekipamento, un pomp nobo, un caminda nobo y un centro di piscado, ta na balor di 20 pa 25 miyon florin.
Tambe tin un proposicion pa fundacion Carmabi maneha e parke di naturalesa y recreacion, pero ainda no tin nada oficial.
