Den e temporada di secura manera custumber Departamento di Agricultura, Cria y Pesca, Santa Rosa ta haci su controlnan pa mira e disponibilidad di awa di dam. Manera nos a publica den un comunicado di siman pasa tin varios dam cu ta bashi. Tin algun cu no ta dispone di mucho awa mas tampoco. Ta simplemente mester bay baha un poco e servicio di entrega di awa di dam pa asina tur nos clientela por haya maske ta un of dos truck.
Durante di e controlnan aki di bishita algun dam primordial a tuma nota cu keto bay tin individuonan cu ta keda tira sushi na e damnan aki. Pa añanan largo nos ta trata na conscientisa personanan pa no tira sushi den e damnan rond Aruba. Pero keto bay esaki ta keda pasa. Na varios ocasion nos ta keda encontra nos mes cu damanan a bira un lugar cu ta keda tira sushi. Dam di Tanki Leendert ta un di nan. Dam di Hooiberg ta keda esun cu mas sushi ta keda tira cu mas frecuente. Nos ta haci limpi awe y ya e dia siguiente tin sushi tira atrobe. Debi na e tantisimo biaha cu ta haya sushi tira na e dam di Hooiberg aki. Departamento di Agricultura, Cria y Pesca Santa Rosa a tuma e decision pa cera e dam temporalmente pa asina limita e acceso pa yega te na e dam pa tira e sushi. Pa nos sorpresa e individuonan aki a dicidi di tira e sushi net caminda cu nos a cer’e. Kiermen yega tira e sushi eybou mes. Asina por sigui menciona. Nos ta compronde tambe cu e ceramento ta causa molester na esnan cu si ta haci bon uso di e awa di dam cual ta nos productornan. Esaki ta haci cu ta limita e acceso pa yega na e awa. Esaki ta bira frustrante pa e agricultor cu kisas e ora mester bay un distancia mas leu na un otro dam pa e por haya awa poco pa muha su cultivo.
Durante di nos control a bin tuma nota cu tin sushi di palet tira na oriya di e dam di “Pal’i Boonchi cu ta e dam cu ta situa poco panort di Weng Kee Supermarket na Piedra Plat. Berdad ta cu no tin awa mas den e dam ta simplemente e parti abou ta lodo cu ta haci esaki poco dificil pa nos di Santa Rosa por haci trabou di limpiesa e mantencion pero esey no ta nifica cu e ta un lugar pa bo bay tira sushi.
Nos ta sigui haci e apelacion na henter comunidad di Aruba pa no tira ningun tipo sushi na e damnan cu nos tin. Corda cu e por contamina e awa y manera tur hende sa e awa di dam ta wordo usa pa nos agricultornan pa muha nan cultivo di fruta of berdura y tambe cria di bestia. Esaki sigur por trece un problema hopi serio.
Bo tin sushi pa tira afo tuma un tiki mas tempo prepara bo sushi e tira esaki afo na companianan cu ta disponible pa tuma e sushi. Un di nan sigur ta ECOTECH situa na Barcadera caminda sin ningun problema bo por tira tur sushi afo eynan. Sea ta mata, palet of cualkier tipo di sushi. Pero no na e damnan cu tin caminda e awa ta wordo usa riba produccionnan cu ta pa consumo local.
