Na comienso di siman un persona a reporta un caso lamentable di maltrato di cacho riba rednan social. Tabata trata di un persona cu tabata maltrata cachonan den su bisindario, e tabata dal nan cu un palo cu tabatin clabo na dje. Esaki a hala atencion di e personanan indica cu a brinda ayudo na e cachonan.
Reportera di Bon Dia Aruba a tuma contacto cu Jacqueline Boderie, ken ta conoci pa yuda bestianan cu ta den necesidad, bestianan riba caya, pa puntra tocante e situacion di e cachonan en cuestion, si a logra captura nan pa yuda nan.
Boderie a indica cu el a logra bay cu un di e cachonan cu a wordo maltrata. Su situacion no tabata bon y ta na veterinario na unda e lo ricibi un tratamento di cinco dia, cual el a remarca ta costa hopi placa. E cacho a ricibi golpi na cara y na su bariga tambe.
Despues cu e cacho termina su tratamento, el a sigui splica, no sa unda ta bay pone e cacho y mirando e situacion, Boderie a indica, e cacho mas cu claro no por bay back unda e tabata pasobra eynan el a wordo maltrata. No ta conoci ken ta e persona cu a maltrata e cachonan.
Casonan di maltrato di cacho regularmente ta wordo denuncia riba rednan social. E aña aki tabatin varios caso di maltrato di cacho cu a causa conmocion den comunidad, entre otro e caso di e cacho Khaleesi, cu lamentablemente a fayece pa motibo di e maltrato cu el a ricibi di su doño.
Esaki ta un caso cu a bay te corte y cu a termina cu e doño di e cacho condena na sirbi varios ora di servicio comunitario pa e maltrato cu el a causa na e cacho.
Otro caso cu tambe a hala atencion di comunidad tabata di e cacho Snowy, cu tambe a wordo maltrata y a fayece. Den e caso aki lamentablemente no a bira conoci ken e persona cu a maltrata e cacho tabata ni tampoco a wordo condena.
Lamentablemente, casonan asina tin hopi, pero esaki no ta haci’e aceptable. Ley ta existi y cu colaboracion di KPA, ta bay sigui reenforsa esaki pa asina comunidad di Aruba por cuminsa realisa cu abuso di animal no ta bay sin castigo.
Abandono y maltrato ta bay contra ley di cacho. Ta importante pa comunidad en general cuminsa actua den esaki, pa ta doñonan mas responsable y cuida mascotanan cu tambe ta sinti y ta sufri.
E pregunta ta surgi, ta cuanto biaha mas mester sigui haya casonan di abuso di bestia di e magnitud aki? E tema di cacho y pushi riba caya ta sigui keda un problema sin precedente y comunidad henter mester bira mas consciente di esaki.
Fundacionnan cu ta yuda cachonan cu ta wordo maltrata ta yen caba, y aunke nan ta dispuesto pa brinda ayudo unda cu nan por, e tema di espacio of unda pa pone e cachonan ta birando un problema riba su mes.
