A pone un kerstboom pa Pasco pa prome biaha despues di e famoso desaster nuclear na Chernobyl na 1986, na e plaza central cerca di e ciudad fantasma Pripyat, a informa e canal di television ZIK di Ucrania.
Anteriormente e hogar di mas di 47.000 residente na Pripyat – na un 3km di e planta nuclear – e luga ta permanece manera un desierto pa motibo di contaminacion di radiacion. Anterior residentenan a yega na ciudad bandona pa decora e kerstboom cu potret di famia, como parti di un campaña organisa pa asociacion di operacion turistico di Chernobyl. Algun di nan a bisa cu nan a trece decoracion manera holoshi pa mustra simbolo di fluho di tempo y tambe pa mustra cu tempo na e ciudad no ta muri, pero ta revivi.
Kateryna Aslamova, di compania Chernobyl Tour, a bisa cu ta prome biaha cu algun ex residente a bay bek na Pripyat desde nan evacuacion despues di e pio accident nuclear di mundo.
Su compania kier wak Pripyat y parti di zona di exclusion rond di e planta bira un luga di partimonio mundial di Unesco. “Bida ta bayendo bek na Pripyat. Ta inusual, iregular y turistico, tur dia e ciudad ta yena cu turista di tur mundo. Nan kier siña nos historia, cu a cambia e curso di acontecimento di tur mundo”, segun Yaroslav Yemelyanenko, fundado di Chernobyl Hub.
