Ken ta sirbi ken?

Nos t’ey pa sirbi gobierno?

Un empresario, di un NV local, ta dicidi cu e ta bay muda su negoshi pa otro adres. Por sucede, no? Nada di otro mundo, berdad? Bon, bo mester naturalmente un permiso di departamento di Asunto Economico pa bo muda bo negoshi. No ta problema, mester tin orden den economia, tur hende mester cumpli, berdad? Bo ta entrega un peticion na e departamento concerni, y despues di un tempo rasonabel bo ta haya e decreto ministerial, ‘end of story’, toch? Parce cu bida empresarial no ta asina facil na Aruba. Laga nos ilustra esaki cu un storia berdadero di un empresario.

Un compania (NV) anto ta bay muda sede di e compania pa otro adres. Nan ta percura pa e documentonan necesario pa por haci e peticion. Nan a pensa cu lo mester entrega e peticion, firma pa e directornan concerni, y cu despues di algun tempo, nan permiso ta keda cla. El a keda cla si, despues di basta tempo, pero a tuma mas di cinco biaha di acudi na e departamento, un biaha hasta e directornan mester a aparece en persona hunto, pa por finalisa e proceso cu ta parce simpel aki. Aña 2017, ta asina gobernacion kier funciona ainda? No si nos tuma e vision y mision cu e departamento tin riba su website. Esaki ta bisa entre otro cu ta propone ‘di desaroya su mes den un organisacion gubernamental optimal cu ta brinda e ciudadano Arubano, companianan local y internacional y instancianan un servicio di calidad halto na un manera eficaz, profesional y dirigi riba e cliente.’

Naturalmente e ciniconan entre nos lo bisa cu awendia tur organisacion tin su mision y vision, pero esey ta pa pone riba website, no pa uza como guia den trabao di tur dia. Por ta cu ta nos ta demasiado optimista cu nos ta kere cu bo mester biba segun bo mes ta predica.  Y nos no ta trece esaki dilanti pa demonifica e departamento, cu sin duda tin bon intencion. Pero si bo no ta yega na pone bo propio actuacion bao di un loep, nada lo mehora di mes.

Kico ta e problema den e tipo di trayecto aki di permiso? Di berdad tur cos mester dura tanto? Segun nos, no. Tin momento cu en berdad mester pone bon atencion prome cu otorga permiso. Por ehemplo e tipo di actividad cu e compania ta bay desaroya y na unda nan ta establece e negoshi. Si ta por ehemplo un actividad cu ta indeseabel o hasta dañino den un zona residencial, lo mester por actua contra esaki. Awor, pakico ta importante pa exigi un permiso pa muda e compania; esey no ta un poco di mas? Pa bisa berdad, no. E problema no ta si un NV, o VBA ta muda su oficina, e sede di e persona huridico.

Pero si por ehemplo ta muda e actividad economico pa un otro luga, unda esey no ta deseabel, mester por para esey. Ta e unico cos cu mester controla. Esey mester dura seis siman o mas? Den caso cu ta trata solamente mudamento di oficina, algo asina mester por keda cla den dos siman? Y ta un tramite cu por tuma luga completamente digital, sin cu ningun director mester sali di su oficina! Keto bay ta parce cu den gobernacion hende no kier comprende cu e tarea di empresario ta gana placa, y no sinta o para den rij na oficina di gobierno. No ta bira tempo pa cuminsa simplifica y despues digitalisa e procesonan aki, pa bon di nos tur?

Un otro ehemplo di un problema cu no a keda resolvi ainda ta yegando cerca nos atrobe: e pago di e dos mita di aña di wegenbelasting. Esunnan cu a haci nan mes e gran fabor di paga tur cos pa henter aña por hala rosea di alivio. Pero tin hopi compania, cu hopi vehiculo, cu ta paga mita aña. Juni a cuminsa y e pregunta ta atrobe si esunnan cu ta paga via banco, cu realmente ta haci Servicio di Impuesto e tremendo fabor di no bin para den rij pa paga, ta esunnan castiga pasobra por ta no tin hende atrobe cu por procesa e pagonan haci na banco. Cu consecuencia cu atrobe nan ta e ultimonan pa haya nan sticker. Aparte cu e ta un problema caba pa e ciudadano individual, pa un empresa cu ta depende di su material di transporte pa por cumpli cu su compromisonan, e ta un problema mas serio ainda.

Nos sa cu tin diferente departamento di gobierno unda tin persona cu ta haci un tremendo esfuerso pa duna e miho servicio posibel. Nan t’ey y lo t’ey semper, pero esey no ta significa cu e organismo como tal ta move den e direccion di e promesa riba website. Hopi biaha ta referi na  falta di placa pa digitalisa o pa mehora IT cu ta ‘outdated’. Esey por ta berdad, pero tin tanto cos cu ta un simpel cuestion di organisa trabao, cu of sin computer. Nos ta mira demasiado biaha cu ni esey no ta haci. Dia cu e computer nobo yega, e no ta bay yuda tampoco.