Weekend ultimo, pa marca e conclusion di e Parada di Mucha cu a tuma lugar diadomingo na San Nicolas, pueblo a reuni un biaha mas den oranan di anochi pa e Kimamento di Momito.
Pero ken ta e personahe di Momito, y kico ta su rol clave den temporada di Carnaval? Ademas, pakico mester kim’e? Aki un les chikito splicando e Kimamento di Momo y Momito na Aruba.
E Momo a keda introduci pa prome biaha na Aruba na 1954 door di Henry Bethencourt (alias Heroudini), tres aña despues di su introduccion na Corsou. Segun Heroudini, e storia di rey Momo ta referi back na e tempo Biblico di Jonas y e bayena, durante un tempo unda pica tabata plaga mundo.
Dios a laga cla na hende cu e lo destrui e ciudad a menos cu nan arepenti y stop di comete pica. Y pues asina prome cu hende a cuminsa ayuna, a dicidi cu mester tin un sorto di parada pa clausura e era. Den e parada, un rey cu mascara a ser mira ta cana banda di e publico, un figura representando pica humano. Na final di e parada, a kima e rey aki, simbolisando e fin di un era yen di pica.
Aki na Aruba, a adapta e storia Biblico aki den e folklore di Rey Momo y Momito durante temporada di Carnaval. Maske e no tin tanto aspecto religioso, e kimamento di e rey si ta representa un fin na e dos luna di celebracion, y e comienso di un ciclo spiritual nobo riba e isla. E kimamento di Momo ta tuma lugar net despues di e Parada Grandi, y net prome cu Cuaresma.
Pa despedi di temporada di Carnaval, pueblo ta presencia dos kimamento di rey: Prome, e Momito, cu a tuma lugar diadomingo ultimo despues di parada di mucha. Momito ta representa e clausura di festividadnan di mucha. Momo ta e version adulto di Momito, y su kimamento ta tuma lugar e mesun dia despues di e Parada Grandi na Oranjestad.
E siman aki nos ta bay conclui temporada di Carnaval cu e dos Parada Grandi na San Nicolas y Oranjestad, sigui pa e kimamento di Momo, asina clausurando Aruba su grandioso Carnaval 70!
Fuente: National Archeological Anthropological Memory Management.
