Ken ta mas culpabel? E persona of e sistema?

Despues di e exigencia di cinco aña di prison contra e ex-ministro, como sospechoso principal den e caso Ibis, nos por scucha e mesun argumentonan na su fabor o contra, pero cu un poco mas fervor. Tin hende ta haya cu husticia ta bay mucho duro cune, cu ademas nan no ta sali en busca di e otronan cu sigur tambe a haci malo… “Ta e so mester paga pa e otronan?” nos ta haya tende. Di otro banda tin e opinion, cu ta bisa cu “esun cu haci malo, mester paga pa esey.” “Husticia mester haci su trabao.” En principio nos ta di acuerdo cu e ultimo ponencia aki, aunke nos mester bisa acerca cu e curso di husticia awe ta apenas mita caminda: e defensa no a ni cuminsa ainda cu nan trabao. Asina ta, si nos ta respeta e derecho di e acusado(nan), nos mester warda te ora e caso termina. Bon, esaki ta relativo, pasobra mescos e caso di e ex-prome ministro di Curaçao, esaki por bay dura un par di aña prome cu tin un veredicto definitivo, unda no tin mas recurso legal pa encamina. Y nos no tin pakico di warda pa opina aki dos aña.

Sin embargo, tin hopi aspecto importante di e caso aki, cu apenas a bin dilanti den e caso. E punto mas resaltante pa nos tabata e hecho cu den e caso aki a cana e caminda legal cu un mandatario, pa su responsabilidad den e trayecto cu e tabata dirigi, mientras cu finalmente e no tabata e persona cu tabata dicidi ken ta haya permiso of no. Ta remarcable cu den diferente medio di idioma Hulandes ta papia repetidamente di ‘werkvergunning’ mientras cu nos sistema legal no conoce un permiso di trabao. Nos conoce un permiso y esey ta e permiso di estadia o permanencia (verblijfsvergunning) cu si o no ta inclui tambe e ‘toestemming tot het verrichten van arbeid.’ Na Papiamento nos ta bisa cu e persona tin ‘permiso pa traha’ pero den e caso aki ‘permiso’ ta e equivalente di e ‘toestemming’ Hulandes. De paso mester bisa cu nos ta comprende e eror, ya cu na Hulanda si ta existi dos permiso banda di otro; un di trabao y un pa residencia. Enfin, kico nos kier bisa cu tur esaki?

Simplemente, ora bo caba di paga e ministro encarga cu labor, manera den e caso aki ministerio publico ta argumenta, normalmente ainda bo no a keda cla pasobra e permiso ta bin di ministerio di husticia. Y si nos analisa bon kico a pasa den ultimo 20 pa 25 aña, obviamente e problemanan di corupcion tabata hopi mas grandi na e banda di husticia cu na banda di labor. Nos ta bisando algo cu nos no por proba? Den e periodo ey nos a mira varios director responsable pa permiso sali di e departamento di mal manera, y hasta un ministro di husticia mester a entrega e cartera na un colega, esaki bao presion Hulandes. Asina e pregunta ta surgi den e caso aki, kico a para di e investigacion na banda di husticia? Con nos ta bay kere cu, ban supone un rato cu e acusacionnan di ministerio publico tin base, e mandatario a set up un sistema di corupcion asina bon, cu esaki no tabatin ningun ramificacion na husticia? Straño.

Por cierto, nos a yega di haci e pregunta aki, na un manera discreto, cerca oficialnan di ken nos no ta bay revela nan identidad. E contesta tabata cu tabata necesario limita e investigacion, sino awe ainda nan no lo a caba. Pa cierto hende esey ta ‘een goedkope smoes’ pero nos mester bisa cu tin algo di berdad eyden: cu 20.000 pagina di documento y por lo menos un par di miyon di placa publico (di nos…) gasta riba e caso, esaki tin algo di razonable cune, aunke e no ta satisface nos sentido di husticia, cu tur cu haci malo mester haya… nan dia den corte.

Pero, como ciudadano individual nos tin poco influencia riba e aparato hudicial, y esey tin su banda bon tambe. Aunke tin cos cu si nos por haci. Si nos no kier pa bisa cu nos como pueblo ta haya e mandatarionan cu nos merece, anto nos mester abstene di exigi cos cu un mandatario no por duna nos, no di un manera limpi en todo caso. Esey caba ta un paso hopi importante, si nos mehora nos standard moral. Esey lo ta suficiente? No, pasobra e parti mas importante cu mester sucede, ta e parti di haci e oportunidad pa haci malo, mas chikito posible. Y ta un manera so tin pa haci esaki: reorganisa y restructura gobernacion di un manera drechi, hincando e procesonan di control interno den e procesonan administrativo, y percura pa hende integro ta na mando di e structura di control interno y cu ningun ministro por manipula nan.

Pa cuminsa, esaki lo mester bay sucede pa tur e trayectonan di permiso cu nos conoce, pasobra e corupcion ta concentra, logicamente, unda esun ta paga y e otro ta duna. Loke ta haci nos nervioso ta cu nos ta tende asina poco tocante e trabao necesario aki. Porqué será?