Ta reina un confusion bastante grandi den e asunto di e reapertura ken ta of a forma parti di e acuerdo, cuanto diferente compania cu nomber Citgo tin y di cual ta papiando, etc. Pa gobierno e confusion aki ta tremendo pasobra e ta yuda despista posibel critica riba e deal aki. Ta p’esey e siguiente resumen di tur e companianan , cu si of no ta envolvi den e proceso aki. Ta na gobierno duna claridad di cual compania nan ta papia na ki momento.
PDVSA: Petróleos de Venezuela Sociedad Anónima; constitui na Venezuela na 1976. PDVSA ta 100% propiedad di estado Venezolano y ta propietario di tur actividad petrolero dentro di e pais, y tambe algun operacion den exterior. Di e ultimonan aki, e compania Mericano Citgo Petroleum Corporation ta esun principal.
PDV Holding Inc.: compania lanta segun ley di Delaware (limited liability company, LLC) pa maneha propiedad na Merca di PDVSA. Ta doño di Citgo Petroleum Corporation via Citgo Holding Inc. PDV Holding ta 100% propiedad directo di PDVSA.
Citgo Holding Inc.: compania lanta segun ley di Delaware (limited liability company, LLC) pa maneha propiedad na Merca di PDVSA. E holding aki ta e compania madre directo di Citgo Petroleum Corporation. Tambe segun Moody’s e ta propietario di Citgo Holding Terminals, Southwest Pipeline Holding, y Midwest Pipeline Holding. E tres companianan aki te recientemente tabata propiedad di Citgo Petroleum Corporation, cu a traspasa nan pa e holding, como garantia pa prestamo cu e holding a tuma na 2015.
Citgo Petroleum Corporation: compania lanta segun ley di Delaware (limited liability company, LLC) cu propietarionan Mericano. Na 1986 PDVSA a bira doño pa 50% di e accionnan y na 1990 a bira doño 100% di e compania. CEO: Nelson Martinez, nacionalidad Venezolano y procedente di PDVSA. E compania aki ta esun cu ta doño directo di e tres refinerianan y mas di 6000 punto di distribucion di producto petrolero na Merca. Entre PDVSA y Citgo Petroleum Corporation tin dos holding, cu ta propiedad di PDVSA: Citgo Holding Inc. y PDV Holding Inc.
Negociacionnan desde aña pasa a tuma luga entre e compania aki y gobierno di Aruba, segun gobierno di Aruba, pa rehabilita e refineria na Aruba y transforma esaki den un upgrader di crudo pisa.
Den un declaracion di 11 di juni 2016, un dia despues di e firmamento di e acuerdonan na Caracas, Citgo Petroleum Corporation a saca un declaracion cu nan no ta participe directo den e acuerdo, sino Citgo Aruba. Segun nan declaracion, Citgo Aruba, ta ‘un grupo di compania di operacion’ bao PDV Holding cu lo opera e facilidad, cu Citgo Petroleum Corporation dunando servicio.
CITGO Aruba Holding LLC: segun informacion di gobierno di Aruba (segun consehero Richard Arends den entrevista cu Amigoe, 17 di juli 2016 ), tin un compania bao di e nomber aki estableci na Merca, cu ta participe di e acuerdo firma na Caracas dia 10 di juni ultimo. E compania aki lo ta subsidiario di PDV Holding y lo ta doño directo di e compania di operacion na Aruba. Nota redaccion: No por haya te awor ningun dato tocante e compania aki riba internet. E comunicado di prensa di Citgo Petroleum Corporation no ta menciona e compania tampoco.
Companianan cu nomber Citgo registra na Aruba:
Citgo Aruba Refining NV; KvK no. 46550; directornan: IMC International Management & Trust Company NV; Glenn Wayne Hilman; Alirio José Zambrano; Balvinder Kaur Bhogal-Mitro.
Citgo Aruba Terminal NV; KvK no. 46551; directornan: trust IMC International Management & Trust Company NV; Karl Durand Schmidt; Alan James Flagg; José Luis Zambrano.
Citgo Aruba Marine Operations NV; KvK no. 46552; directornan: IMC International Management & Trust Company NV; Alan James Flagg; José Luis Zambrano; Jorge Luis Toledo.
Citgo Aruba Sales & Marketing NV; KvK no. 46553.; directornan: IMC International Management & Trust Company NV; Alan James Flagg; José Luis Zambrano; Jorge Luis Toledo.
