(AP) – E morto repentino di President Vladimir Putin su antagonista mas grandi a laga un herida habri den oposicion politico na Rusia.
Alexei Navalny, di 47 aña, tabata e critico di Kremlin miho conoci tanto nacional- como internacionalmente. Prome cu el a fayece na un colonia penal diabierna, e luchador anti-corupcion, organisador di manifestacion y politico cu un sentido di humor a bira e suheto di un documentario cu a gana premio. Su canalnan riba YouTube tabatin miyones di suscrito.
Navalny tambe tabata e prome lider di oposicion na Rusia cu a ricibi un sentencia di prison largo na Rusia den añanan recien. Tin otronan cu tambe a ricibi castigo, cual cu e invasion di Ucrania a bira mas fuerte. Den e 3 aña desde cu Navalny a perde su libertad, varios opositor prominente a keda deteni mientras cu otronan a huy for di e pais a causa di e presion. Varios di nan sinembargo a sigui cu nan desafio contra Putin, organisando fuera di e pais, pushando pa sancion contra Rusia, dunando sosten na Rusonan den exilio cu ta pensa mescos of continuando cu nan trabao for di den prizon.
Navalny su ekipo
Coleganan di Anti-Corruption Foundation – cual Navalny a funda den aña 2011 pa expone corupcion politico – y su otro asociadonan cercano, hopi biaha mester a traha sin su persona hasta prome cu el a keda encarcela. Den aña 2020, Navalny a ser venena y a dura 18 dia den un coma di cual el a recupera na Alemania. Su termino di prison a inclui mas di 300 dia den isolacion, cu comunicacion posibel pero dificil for di un cel di castigo.
Su asociadonan cercano, hefe di strategia Leonid Volkon, hefe di investigacion Maria Pevchikh, director di fundacion Ivan Zhdanov y vocero Kira Yarmysh, tambe a enfrenta presion y persecucion na Rusia. Den añanan recien, tur a sali for di e pais y ta traha for di exterior, cu comentarionan politico y e fundacion su marca riba YouTube cu ta expone corupcion politico.
Mikhail Khodorkovsky
Mikhail Khodorkovsky di 60 aña ta un figura di oposicion Ruso den exilio. El a pasa un decada den prison na Rusia bao acusacionnan considera como vengansa politico, pa motibo cu el a desafia mando di Putin den aña 2000. El a ser laga den libertad na aña 2013 prome cu Rusia a bira anfitrion di e Olimpiada di aña 2014.
Aunke Khodorkovsky su grupo eventualmente a separa, el a sigui cu su critica vocal contra e Kremlin. Despues di Rusia su invasion di Ucrania dos aña atras e siman aki, su persona y otro criticonan a forma e Comite Anti-Guera, un aliansa di oposicion amplio cu ta opone e invasion y ta busca kita mando for di Putin.
Vladimr Kara-Murza
Un ex-reportero y awo politico prominente di oposicion, Vladimir Kara-Murza a ricibi e sentencia mas largo cu un critico di e Kremlin a yega di ricibi na Rusia, 25 aña den prizon bao acusacionnan di traicion. E ta cumpliendo su sentencia na un colonia penal den Siberia y a ser poni den detencion solitario varios biaha.
E tabata un asociado di e lider di oposicion Ruso, Boris Nemtsov, otro critico fuerte di Putin ken a ser asesina na aña 2015. Añanan prome esaki a tuma luga, Kara-Murza y Nemtsov a lobby pa aproba e Magnitsky Act na Merca. E ley tabata den respuesta na e morto den prizon di abogado Ruso Sergei Magnitsky, ken a expone e skema di fraude di impuesto.
Ilya Yashin
Ilya Yashin a nenga di sali for di Rusia a pesar di e presion cu autoridadnan a aplica contra su persona. El a bisa cu sali for di e pais lo kita peso for di su balor como politico. Yashin, un miembro di e conseho municipal di Moscu, tabata un aliado vocal di Navalny. Eventualmente el a ser aresta den juni di aña 2022 y a ricibi un sentencia di 8 aña y mey den prison pa “plama informacion falso” tocante ehercito Ruso, un ofensa criminal desde maart 2022.
E sentencia fuerte no a silencia su criticanan fuerte contra e Kremlin. Yashin su asociadonan regularmente ta actualisa su paginanan di rednan social cu mensahenan cu e ta manda desde prison. Den un entrevista na september di aña 2022, el a urgi e Rusonan ordinario yuda transmiti esaki tambe.
