Ken ta controla kico y con?

Ken ta controla kico y con, unda, ki tempo? Un pregunta clave cu ta hiba nos na curason di gobernacion. Aki nos no ta papia di kico ta e maneho di tal o cual partido politico, pero nos ta referi na e tareanan ‘timeless’ di cualkier gobernacion. Ta trata di e tareanan di control estableci den diferente ley, unda ta pone e autoridad den man di un mandatario, o un departamento concerni cu mester supervisa un cierto proceso y actua como e instancia cu ta sanciona. Den cierto caso ta mas cu cla ta ken mester supervisa y sanciona, tin otro caso unda den e ley por ta poni masha cla ken mester actua, pero den comunidad mayoria di hende no sa ta ken mester haci esaki.

Un ehemplo di esaki ta e caso di e reparatietoeslag, introduci poco aña atras pa e gobierno anterior. Variando di salario minimo te na un salario mensual di 2.500 florin, esunnan cu den e categoria aki a cuminsa haya e derecho di cobra e suma tur luna cu ta coresponde cu nan salario di e momento ey. Pero kico ta pasa ora e dunado di trabao ignora e regla legal aki y no ta paga e empleado e derecho aki? Kico ta pasa den e tantisimo casonan cu no ta tur empleado ta nan altura di e derecho aki? Pregunta: tin un control anual na Servicio di Impuesto, unda ta controla e cantidad di persona cu un cierto empresa tin den servicio, cuanto nan a haya y si e empresa a paga nan e toelage si of no? Y den caso cu constata cu nan no a haya e suma riba cual nan tabatin derecho, ta bin un coreccion riba esaki? Pasobra finalmente e idea tabata cu ta gobierno ta carga cu e gastonan di e plan aki, compensando e dunado di trabao den loke e tin cu paga na impuesto riba salario, cu supuestamente el a deduci di e salario bruto di e empleado. E ironia ta cu menos e dunadonan di trabao haci uzo di e areglo aki, menos gobierno mester restitui… Anto aki tin un beneficio mutuo si lo menos posibel hende haci uzo di e areglo? Nos lo tin gana di sa con e control aki ta regla, y mas ainda pasobra regularmente nos ta topa hende cu no ta na altura cu nan por cobra e beneficio, o nan sa pero nan dunado di trabao a conta nan un of otro storia pakico nan no ta haya esaki. Of nan no ta ni ‘raise the issue’ pa miedo di perde nan trabao.

Otro ehemplo den mesun ambiente aki: e pension obligatorio pa sector priva. Un producto (positivo) di e Dialogo Social di algun aña pasa, unda e seguro di pension aki a keda introduci banda di e pension general (AOV). Un beneficio sigur, talbes no tanto a corto plaso pa esunnan cu ta bay cu pension dentro di algun aña, pero pa esunnan cu tin 15, 20 aña o mas pa bay ainda den proceso laboral, un beneficio importante banda di nan AOV, cu den hopi caso no ta 100% pa motibo di no a pasa henter e periodo di contribucion di AOV na Aruba. Esaki ta yuda combati e problema creciente, manera comenta den nos editorial di diahuebs pasa, di hende di edad cu mester purba sobrevivi di un AOV corta, den cierto caso di menos di 400 – 500 florin, cu ta naturalmente absolutamente insuficiente pa sobrevivi. Banda di e beneficionan, e medida legal aki tabatin y tin su desbentahanan tambe, aunke nos no ta bisa cu esaki ta supera e beneficionan. Un di e desbentahanan tabata e aumento di e ‘cost of doing business’ sigur entre e empresanan chikito cu menos stabilidad financiero. Y tambe e ta duna mas oportunidad ainda na esunnan cu no tin plan di cumpli y ta aumenta e bentaha cu nan tin den competencia desleal riba nan rivalnan cu si ta tuma ley y futuro di nan empleadonan na serio. Kico anto a bira e problema? E supervision den cuadro di e ley, cu ta primeramente responsabilidad di e ministro encarga cu asunto financiero. Nos sa cu e actual minister tin mil y un cos na su cabes den e periodo aki, pero nos mester señala cu e anterior ministro a baha bay sin ni un dia bisa mita palabra tocante e responsabilidad aki. Contal cu e companianan di seguro cu ta atende e clientenan cu acudi cerca nan pa sigura nan empleadonan, no tin responsabilidad como entidad priva pa core tras di esunnan cu no ta yega cerca nan.

E situacion ta tal cu mas largo tarda pa actua, mas grandi e daño financiero ta, sigur pa e empleadonan cu ta haya nan mes den e situacion aki. Y no mester subestima e problema di por acudi na un instancia cu por yuda den un caso asina; pa miedo di perde trabao tin demasiado hende ainda cu no ta haci denuncia. Si nos ta asina leu caba cu hasta un ministro a mustra riba e falta di confidencialidad di cierto instancia den caso di keho, ta bira tempo pa cuminsa actua.