Pagonan di trahadonan di limpiesa di SKOA cu a wordo realisa mester tabata conforme ley y no bao di subsidio di salario cu tambe tin personal di enseñansa cu ta cay bou di dje, den esaki 12 miyon florin a wordo acumula desde 2015 y dos diferente hues a duna ex-minister Armando Rudy Lampe rason dos biaha. Sinembargo SKOA a opta pa no cumpli cu sentencia di hues.

Mirando esaki, Bon Dia Aruba a haci un investigacion mas profundo tocante e caso specifico aki di trahadonan di limpiesa, na unda cu for di 2015 ex-minister di Enseñansa na e momento ey, Michelle Hooyboer a firma un M.B. (Ministeriële Beschikking) pa duna tur e trahado di limpiesa cu ta cay bao di SKOA e mesun status y condicion laboral cu un funcionario publico.

SKOA reunion entre trahadonan di limpiesa

Dia 5 di februari di aña 2020 a tuma luga un reunion entre trahadonan di limpiesa y director di SKOA, Anuesca Baly. Despues di esaki, Baly a duna un declaracion na medionan di comunicacion na unda a bin dilanti e pregunta si ta berdad cu SKOA ta trahando contra ley; el a declara cu “absolutamente cu no, tur e pasonan a wordo cana. Den caso aki un M.B. a wordo firma door di minister di enseñansa anterior, Michelle Hooyboer y aworaki ta un continuacion di gobierno anterior”, segun Baly ta señala.

Pa loke ta SKOA su banda, nan ta considera cu mester cumpli cu lo cual nan a haya como mandato di e minister di enseñansa anterior.

SKOA ta perde dos caso den corte contra ex-minister Armando Rudy Lampe

SKOA y 91 trahado di limpiesa a dicidi di hiba ex-minister Armando Rudy Lampe –cu den tempo ey tabata minister di Enseñansa– den dos ocasion dilanti Corte. Den e prome sentencia dia 6 di april 2020, e hues N.K Engelbrecht a rechasa SKOA y e 91 trahado di limpiesa nan peticion, dunando Lampe rason, pa motibo cu SKOA a bay contra ley y a duna e trahadonan di limpiesa e status cu no por, segun ley.

Den e sentencia hues tambe ta indica cu e costo di trahadonan di limpiesa tin cu wordo paga via costo di operacion di SKOA y no den e post di personal di SKOA. Akinan SKOA ta basa su mes riba articulo 31 di Landsverordening basisonderwijs (LvBO) cu ta dirigi solamente pa personal di SKOA y no pa trahadonan di limpiesa. Segun hues, trahadonan di limpiesa ta den servicio di SKOA a base di un contract laboral di e Codigo Civil di Aruba (civielrechtelijke arbeidsovereenkomsten).

Despues di e prome sentencia, SKOA no a cumpli cu e decision di e hues y segun Lampe a confirma na Bon Dia Aruba prome cu su termino como minister a termina cu “te dia di awe nan a sigui paga e trahadonan di limpiesa via costo di personal y SKOA ta nenga di haci e cambio”. Den un estado di derecho sano y saludabel, e sentencia di un hues mester wordo cumpli pa cualkier persona y cualkier instancia.

E di dos caso, pa cual hues M. Soffers, a duna sentencia di dia 17 di mei di aña 2021, SKOA ta bolbe hiba Lampe dilanti Corte na unda cu SKOA un biaha mas, a bolbe perde. Hues M. Soffers a referi na e sentencia di dia 6 di april di aña 2020, caminda cu e trahadonan di limpiesa mester wordo paga bao costo di operacion di SKOA.

Tres punto di interes di Minister di Enseñansa actual Endy Croes

Minister Endy Croes dia 20 October 2021 a publica riba su pagina di Facebook “Dialuna ultimo na Bestuurskantoor a tuma luga e prome reunion di e comision. E comision a wordo forma door di un Ministerraad besluit (MB) y a haya e tarea pa alrededor di 30 dia presenta conseho y solucion concreto”.

“E tres punto di interes ta lo siguiente: (1) con lo mester sigui paga e werksternan si ta via exploitatiekosten of overige personeelskosten. Mester agrega cu tin un veredicto di hues cu ta hunga un rol, a pone tur documentonan riba mesa y a prepara un file di basta documento pa e miembronan di e comision pa den cuadro di ley pa trece un solucion structural. (2) pa haya claridad riba e suma di mas o menos 5 miyon florin mensual cu e stichting no a ricibi mas di Financiën, cu tabata pa paga e primanan na belastingkantoor. (3)“Terugbetaling” di e suma di mas o menos 970 mil florin cu SKOA a ricibi di mas.

Personalmente Responsabel (persoonlijke aansprakelijkheid)

Preguntanan cu comunidad y personanan trahando den area aki, vooral e trahadonan di limpiesa cu lo mester haya contesta, ta ken lo para responsabel pa e 12 miyon y ki dia lo presenta conseho y solucion concreto?

Di otro banda, den un declaracion Anuesca Baly director di SKOA, di dia 5 di februari di aña 2020, el a declara publicamente cu SKOA ta basa su maneho di pago di trahadonan di limpiesa riba decreto ministerial di 2015 di ex-minister Hooyboer.

Ta importante pa destaca cu dia 6 di april 2020 hues a dicta sentencia unda e decreto ministerial cu SKOA ta basa su maneho riba dje no tin ningun peso huridico y SKOA no a cumpli cu e sentencia, 17 di mei 2021 hues ta bolbe dicta un otro sentencia y pa di dos biaha SKOA no ta cumpli cune. Ex-minister Lampe como minister di enseñansa na e momento ey, a manda carta pa SKOA pa regla e situacion di pago di trahadonan di limpiesa pa cuminsa paga nan via costo di operacion di SKOA tampoco no a cumpli.

Segun buki 2:14 di Codigo Civil den su articulo 14 ta regla e responsabilidad di un director di un fundacion na unda cu si conscientemente of structuralmente e pone e fundacion den un problema financiero of si e actua contra ley, e lo por wordo poni personalmente responsabel (persoonlijke aansprakelijk).