Den cuadro cu tur e controversia y pregunta nan habri relaciona cu e reciente trato cu gobierno di Aruba a firma na Venezuela, segun Parlamentario Xiomara Ruiz Maduro, pueblo merece un splicacion pasobra tin hopi pregunta habri pa locual ta e reapertura di e refineria.
Diahuebs merdia a circula noticia den media nan internacional cu Roberto Rincon, empresario Venezolano, a declara su mes culpabel di fraude pa obtene contracto nan di compania di refineria Venezolano segun departamento di husticia Mericano. Segun diferente fuente nan di media nan internacional, Roberto Rincon a declara su mes culpabel den un corte federal na Houston pa dos cargo incluyendo conspiracion den un fraude envolviendo oficial nan na Petroleos de Venezuela S.A. (PDVSA). Segun Parlamentario Xiomara Ruiz Maduro , su pregunta ta ken ta sigura nos cu na Aruba Minister Eman y Minister de Meza no a haña placa bao di man. ”E homber aki a declara su mes culpabel, Minister de Meza a bisa cu e tabata deal cu Rincon pa e reapertura di e refineria, Rincon a cay sera pasobra nan tabata sospecha cu e tabata soborna e hendenan di PDVSA pa e por yega na contract , awo e ta admiti cu e tabata haci esey, anto awo bo ta wak tur e tempo ey Minister de Meza ta cune mes e tabata deal” sra. Maduro ta comenta.
Referiendo na un articulo cu Bon Dia Aruba a publica den September di 2015, Minister Mike de Meza, compaña cu colega Minister di Labor Paul Croes a haci un bishita na Houston aña pasa na unda a reuni cu ehecutivonan di CITGO. ”Corda bon cu ta Houston nan a bay, anto pesey awo bo por compronde tambe pakico juist ta Houston, Texas y no Caracas.” sra .Maduro ta comenta.
Sra.Maduro ta agrega cu Rincon tin ”assets” na Aruba y sin lubida ta cu su avion e homber Carvajal a bin Aruba. ”E homber aki ta un contratista grandi den e mundo di refineria, y ami no por confirma esaki ni por tin prueba pero e pregunta ta bin pa dilanti awo si Minister Eman, de Meza y Otmar lo por a haya basta placa for di e homber aki. Atrobe , ami no por bewijs esey, sinembargo e homber Rincones ta conoci cu e Minister nan, tin potret sinta cu de Meza. E situacion aki ta basta cuestionabel pasobra awo e pregunta ta, ken por sigura nos cu e Ministernan na Aruba no lo a wordo soborna tambe?” sra.Maduro ta comenta.
