Ken por biba di… Un AOV so…?

E pregunta den e titulo aki pa mayoria di nos lo ta uno retorico; nos lo no por. Y sigur no na e nivel di prijs den nos actual economia, cu no ta laga espacio pa speranza riba un bida sin preocupacion pa mayoria di e poblacion. E situacion aki ta mara na algun circunstancia dificil di cambia, sin repercusion riba otro tereno. Por ehemplo, e actual nivel di un pension completo di AOV pa un pareha ta mas o menos na nivel di e salario minimo. Nos ta tende ultimamente caba opinion cu mester ta posible pa aumenta e pension te na un nivel cu ta brinda mas posibilidad na nos hendenan di edad pa enfrenta costo di bida. Un problema ta pa bay paga hende cu no ta traha mas cu hende cu ta soda duro henter aña pa nan haya e pago ey. “Bon, anto nos ta aumenta salario minimo drasticamente”, lo ta e sugerencia. Wel, si nos kier core cu sikiera un parti di e hotelnan cu ta carga nos economia, nos por haci esey. Por fabor corda si cu na e momento aki nos salario minimo – di riba mil dollar pa luna – ta un di e salarionan mas halto den e region, sigur compara cu e paisnan di mayor competencia manera Jamaica, Republica Dominicana y Cuba. Ta mas tanto e teritorionan Mericano den nos region cu ta di e nivel di salario, y costo di bida, cu nos tin. Esey no ta kita cu e costo di bida, segun e criterionan di e ‘bestaansminimum’, pa un pareha ta na Afl. 3845 pa luna, casi dos salario minimo. Cu otro palabra, un pareha cu ta haya un AOV completo lo mester tin otro fuente di entrada pa nan sobrevivi. Por ta cu nan no ta biba nan so, sino cu otro famia, compartiendo e gastonan di hogar. En todo caso, riba nan mes y sin otro medio di existencia nan ta den problema grandi.

Naturalmente e siguiente pregunta ta kico por haci den e situacion aki. Banda di e hecho cu tin hende cu tin un pension banda di nan AOV, cu hasta por ta considerable den caso di por ehemplo empleado publico y di empresanan grandi, cu un salario bastante halto, cu no ta tur tampoco, tin hopi mas cu no tin. Es mas, tin hopi cu no tin mas cu un AOV na mitar o na 40%, pasobra esey ta coresponde cu e añanan cu nan a biba na Aruba. Esaki ta un di e consecuencianan mas grave di e importacion masivo di trahador di exterior cu awor ta pensionado y no semper ta bay nan pais di origen, y ta depende aki di un AOV di no mas di 300 pa 500 florin. Ora nan no por mantene nan mes, nos tin como comunidad e obligacion pa provee pa nan. Den caso cu nan a bira Hulandes, ley di bijstand ta conta pa nan tambe. Nos por imagina cu esaki ta e cosnan cu nos politiconan no gusta discuti, y peor ainda si nan ta keda promove e situacion aki cu mas hotel cu mester habri, y ta ‘gaña lubida’ e problemanan cu ta bin despues. Ta parce cu di e poco Frances cu nan a siña, en todo caso nan a comprende e consigna di varios siglo pasa: “ Après nous la déluge”. Despues di nos, e diluvio; no ta importa nos loke ta pasa despues. Naturalmente e manera di pensa aki no tin nada di haci cu sistema di pension, cu hustamente ta exgi di nos cu nos ta purba planea varios decada nos dilanti. Y no por bisa cu den e ultimo decadanan aki no tabatin debate y intento pa cambia algo. Lamentablemente varios di e intentonan aki tabata bay contrario na loke a spera. Edad di pension a cuminza mas di 50 aña pasa na nivel di 65 aña. Esey a cambia pa 62 y despues pa 60 aña, unda ya a cuminza mira e problemanan pa solvencia di e fondo surgi, sigur si tuma na cuenta cu e grupo di pensionado lo a bay crece fuertemente, proceso den cual nos ta actualmente. Despues ademas a redobla pension, sin medida pa cubri esaki. Tempo cu e fondo a keda bashi, algo mas di 10 aña pasa, a bin e aumento te 65 aña di edad di pension: ‘back to square one’, nos por bisa.

Awor nos ta tende di e lider di e partido opositor, no asina grandi mas, cu mester ta posible aumenta e suma di pension AOV. Nos no ta cuminza grita di biaha cu no por, nos no ta den e arena politico, pero lo tin gana di scucha o mihor ainda lesa con e tin pensa di haci esaki. Pasobra, bolbiendo na e parti inicial tocante salario minimo y AOV, con ta haci esaki y hacie bastante mas halto cu e salario minimo.

Ademas, nos a keda cu un pregunta. Durante gobernacion di e actual lider opositor aki a introduci un seguro di pension obligatorio pa sector priva, hustamente pa atende e problema di un AOV cu no ta suficiente pa biba, den tanto caso. Ni su gobierno, ni e actual a nombra un supervisor pa vigila cumplimento di empresa den sector priva cu e areglo aki, a pesar di e problemanan señala regularmente. Nos no ta tende nada, ni di e opositor, ni di gobierno. Esaki no ta manera di goberna, ni di hiba oposicion…