Net ora comunidad di Aruba ta cabez bao awa den e crisis actual causa pa e coronavirus, un conflicto cu a cuminza den seno di un partner menor di e coalicion, ta al borde di tumba e gobierno aki. Na e momento aki ya no por papia di un conflicto interno mas, pasobra tin, asina leu cu nos ta comprende e asunto, tambe un ministro di e partido grandi di e coalicion envolvi den e problema. Ta ken den e tempo dificil a ki, ta hinca den nan cabez pa hiba un pleito te na e extremo aki?
Pa nos por haya un mihor vista riba e asunto, nos mester cuminza puntra kico ta e asuntonan riba cual tin asina hopi discordia. Nos por menciona nan y trata nan, pero ta bon pa recorda cu te na e momento aki esnan cu ta hibando un guera contra e mandatario aki no por bisa nos cu tanto palabra pakico nan no tin confianza mas den e ministro aki. Loke nos a tende promer cu a bay den e periodo reciente di silencio, cu supuestamente mester a trece un solucion, e ministro tabatin mala custumber di yega laat o no bin reunion mes… Esey no ta parce nos suficiente motibo pa kier pone un mandatario renuncia, y p’esey tambe no tabatin un base di apoyo den parlamento pa manda e mandatario cas.
E consulta interno a tuma lugar, aparentemente, pero no a trece solucion. Kico tabata e siguiente ‘move’ di e ministro encarga cu Husticia, cu apoyo aparente di su colega di e partido grandi, encarga cu sector primario? Trece e asunto den seno di conseho di ministro y bisa cu nan no por traha mas cu e colega. Un posicion asina naturalmente mester ta basa riba algo mas cu un simple disgusto personal, y esey ta parce nos e caso tambe. Tin varios caso andando unda tin discordia, y grandi. Uno ta e maneho di e caso di Serlimar, unda e asunto a bay ‘surseance van betaling’, loke no tabata di agrado di su copartidarionan. A bin e asunto di e tratado internacional encuanto proteccion di bida marino, unda e ministro encarga no tin intencion di firma pa habri un ‘free for all’ den nos awanan pa cacho cu pushi bay pisca cu harpun. Ademas cu Hulanda ta siguiendo e asunto aki cu atencion pasobra e tratado no ta asunto di Aruba, pero na promer lugar di Reino. Di berdad nan, e ministro di Husticia y su colega di Sector Primario, ta desea pa nan colega bay viola tratado pa nan amigonan por bay pisca? Ta desea nan exito.
Tin e asunto tambe di e acceso na Parke Nacional y e areanan cu ta cay awor bao custodia di e fundacion cu ta inclui tambe e parkenan marino, unda e companianan cu ta gana placa cu vehiculo special pa tereno ta exigi pa por drenta parke. Loke nan no kier discuti ta con ta haci cu e destruccion di naturalesa cu nan a ocasiona caba. E ministro en cuestion a opta pa mustra riba e autoridad di e fundacion y cu e no ta bay mishi cu esaki. Loke actualmente a causa e asunto pa rementa siman pasa ta e investigacion cu ta haciendo den Departamento di Infrastructura y Planificacion (DIP) tocante iregularidad cu lo ta tumando lugar cu otorgamento di tereno. No ta conoci exactamente kico a pasa y ken a haci kico, pero esey no ta e argumento. Unda e contrincantenan di e ministro en cuestion ta fayando ta, cu ora un ministro ta ordena un investigacion cu por tin consecuencia penal, e unico actitud corecto pa un parlamentario o ministro ta pa hala atras y bisa: “laga husticia haci su trabao.” Anto net esey no ta sucede? Di hende drechi no por spera nada otro cu nan ta laga e investigacion tuma lugar, y a base di e resultado, unda tin hende pa castiga si of no, ta tuma un posicion encuanto e ministro mes. Y pakico nos ta mira nan ta haciendo net lo contrario? Laga nan splica. Claro cu nos tambe ta tende tur e storianan tocante e interesnan economico tras di cortina, cu mester haya acceso na piscamento cu harpun o acceso na e parke, pero esey no ta relevante, tanten e mandatarionan cu ta pusha e garoshi aki no bin dilanti y bisa kico realmente ta nan agenda.
Nos pregunta clave den e asunto aki ta: kico ta e interes di Aruba den esaki? Meymey di e crisis mas grandi cu Aruba a yega di conoce nos mester bay atende un pleito entre mandatario pasobra algun di nan ta pone interes parcial dilanti interes general? Anto pa colmo di un partido cu den eleccion pasa a haya golpi electoral grandi y awor tin e osadia di menasa di baha gobierno? Manera e situacion ta awor, y sigur despues di e retiro prematuro di nan vote-getter principal, cu ta sinta na cas warda investigacion penal caba, nan ta e partido cu menos por menasa cu eleccion, pasobra nan ta esun cu mas tin di perde eleccion. Nan por dicidi ki dia lo tin eleccion: e aña aki o na september 2021. Pero nan ta esun cu menos por afford bay eleccion.
