Kehonan pa mal servicio na botica p’ariba di brug: AZV: Esnan cu ta sinti cu no ta hayando bon servicio por cambia di botica na april

Recientemente, lectornan di Bon Dia Aruba a acerca Redaccion cu preocupacion pa e servicio cu nan ta hayando di un botica p’ariba di brug. Bon Dia Aruba a acerca director di AZV, Edwin Jacobs pa pidi comentario y un solucion pa e lectornan.

Un lector kende a acerca nos Redaccion a indica cu pa algun tempo caba e ta hayando mal servicio di su botica p’ariba di brug. Segun e lector, kende ta un adulto mayor, cada biaha cu e busca su remedi e ta haya apenas un manyen di pildo, loke ta nifica cu e mester keda bay e botica cada rato. E lo prefera pa haya un cantidad grandi, por ehemplo pa henter luna of tres luna, asina e no tin cu haya manera pa yega botica frecuentemente.

Mas cu un persona a menciona cu nan tin e problema cu ora dokter manda receta pa nan, y nan bay e botica pa busca nan remedi, ta bin haya e situacion fastioso cu e botica no tin e receta. Dokter nan manera di traha actualmente ta completamente digital, pues e pashent mes no ta ricibi un receta di papel pa hiba cerca e botica. Esaki ta pone cu algun di e pashentnan ta bay te na e botica por nada, y considerando cu ta trata di hende cu kebrante di salud y/of edad avansa, esaki ta causa hopi inconveniencia.

Pa cu esaki, Edwin Jacobs di AZV a bisa Bon Dia Aruba cu AZV no a ricibi ningun keho oficial tocante e botica en cuestion. Sinembargo, si el a duna algun conseho pa aseguradonan cu no ta ricibiendo e servicio cu nan merece na nan botica.

“Ta bon si pa nos recorda nos aseguradonan cu e luna di april y luna di october ta dos luna cu nan por cambia di botica sin ningun problema y sin ningun motibo,” el a bisa.

Pero esey tampoco ta nifica cu no por cambia di botica na otro momento. “Otro oranan cu nan kier cambia di botica, nan lo mester duna nos e motibo pa nos wak si e motibo ta un motibo valido pa cambia di botica,” Jacobs a menciona.

“Pues esnan cu ta sinti cu nan no ta hayando servicio bon di botica, na luna di april awo nan por cambia di botica,” el a bisa.

Tambe pashentnan por tene cuenta cu ta bon pa AZV tambe ta na altura si tin algun keho of inkietud, pues ta un bon idea pa meld cerca nan ora tin problema cu dokter y botica.