Dienst Huur- en Consumentenzaken (DHC) ta informa cu nan a ricibi keho di consumido cu cuenta di banco a keda blokia, ‘cu e forma con e proceso aki a sosode por ta hopi irasonabel pa e consumido’.

Segun e instancia e banco concerni a saca un comunicado menasando cliente cu lo cera of blokia cuenta di banco. Bon Dia Aruba a purba di haya e banda di nan pa haya un comentario riba e kehonan di clientenan y tambe riba locual DHC awor ta trece dilanti. Sinembargo te awor nos no a logra.

Segun DHC e banco ta uza e reglanan pa prevencion y combatimento di labamento di placa y terorismo pa actua asina contra nan clientenan. Sinembargo tin diferente manera pa verifica e identidad di e cliente asina e instancia ta bisa:

“Segun ordenansa pa prevencion y combatimento di labamento di placa y terorismo (landsverordening voorkoming en bestrijding witwassen en terrorismefinanciering, AB 2011 no.28), banco ta obliga pa entre otro investiga y verifica e identificacion di e cliente. Articulo 19 di “ ordenansa prevencion y combatimento di labamento di placa y financiamento di terorismo” (AB 2011 no. 28): Si acaso e cliente ta un persona fisico, por verifica su identidad por medio di documento, dato of informacion nan di fuente independiente y confiabel.”

Dienst Huur- en Consumentenzaken ta bisa cu nan ta compronde di Centrale Bank cu tin diferente manera cu e banco por haci esaki. Ademas e instancia ta bisa cu por a compronde di articulo 9, lid 1 di e mesun ley cu e banco ta prohibi di establece un relacion comercial y/ of haci un transaccion si e no por cumpli cu e investigacion di cliente.

“Ley Regeling verificatie documenten LWTF (AV 2012 no 11), articulo 1 inciso 1 ta bisa: Como documento riba cual por cumpli cu articulo 19 (verificacion di identidad), inciso 1 y 5, di e ordenansa pa prevencion y combatimento di labamento di placa y financiamento di terorismo ta señala:

  1. a)      un documento di biahe valido, manera indica den articulo 2 di ley di Paspoort (Stb 1991, 498);
  2. b)      un rijbewijs valido, manera indica den articulo 10, inciso uno of dos, di ordenansa wegverkeer (AB 1997 no. 18);
  3. c)      un identificacion valido, manera indica den articulo 2, inciso uno di ordenansa identiteitskaarten (AB 2001 no. 8);
  4. d)     un documento di biahe valido emiti pa e autoridad di e pais di procedencia y cu ta dispone di 1o number di registracion di e titular; 2o pasfoto di e titular; 3o nomber y fam di e titular; 4o fecha di nacemento y luga di nacemento di e titular; 5o e pais y instancia di emision; 6o fecha y luga di emision di e documento di biahe; 7o. fecha di vencemento di e documento di biahe.”

Manera por a lesa aki riba, segun ley tin diferente documento cu e banco por uza pa verifica e identidad di e cliente, segun DHC.

Pa e motibo aki Dienst Huur- en Consumentenzaken ta urgi tur consumido cu a keda perhudica pa motibo di e decision aki pa  pasa personalmente of yama Dienst Huur- en Consumentenzaken na 582-9914 pa informa esaki.