Reciente por a tuma nota riba medionan social, cu tin persona ta keha riba e cambio di placa nobo. Nan ta paga na cierto minimarket cu e placa nobo, y nan ta haya bek e cambio den placa bieu. Apesar di no ta na agrado di e clientenan, e ta cuadra cu e skema introduci pa Banco Central di Aruba
A acerca un cliente, kende a bisa cu e ta paga cu placa nobo, pero ta ricibi bek esun bieu. E ta nenga di tuma e placa, anto e persona di minimarket ta rabia. “Ami tin cu duna nan nobo y ami ta haya bieu”, el a bisa. Ademas ta keda na e cliente pa bay cambie na banco. Di otro banda, e comerciantenan tambe tin obligacion di ricibi billetenan bieu; por lo menos te cu dia 11 di augustus.
E cliente ta expresa cu e no ta haya esey husto, mirando cu nan mes ta esun cu despues tin cu bay banco, pa gasta nan tempo, pa cambia e placa. Segun pagina web ‘Aruba su florin’, comunidad tin te cu dia 11 di augustus pa uza biyete bieu como forma di pago, ya cu esaki ta sali for di circulacion y no lo por ser uza mas pa haci pago entrante e fecha di 12 di augustus.
For di dia 12 di augutus, tanto persona comun, como comerciante, lo tin un periodo di seis luna, pa cambia biyetenan bieu na cualkier banco comercial. Ultimo dia pa haci esey ta 4 di december 2019. Despues di esaki, biyetenan bieu por ser cambia solamente na Banco Central di Aruba.
Ultimo simannan aki, Banco Central di Aruba ta ofreciendo sesion gratis di informacion den diferente luga rond di Aruba. E obhetivo ta pa informa y asisti comunidad, lo mas tanto posibel, den e proceso di transicion aki.
